Seleccionar una pagina

Dorsièr

0 |

Quaranta Tres – Felip Biu

Quaranta Tres

Un recuèlh de sèt nòvas, entre fantastic e sciéncia-ficcion

Quaranta Tres

Felip Biu
Occitan
Edicion Per Noste, 2019
22 x 14cm
80 paginas
5,50 €

Ne'n saber mai

Felip Biu, reviraire de Lovecraft per Letras d’Òc (véser l’entrevista) publiquèt fa qualques meses un recuèlh de sèt nòvas que navegan entre fantastic, sciéncia-ficcion e literatura d’anticipacion. La lenga, un gascon ric e saborós que l’autor amolèt e agusèt dins son trabalh de revirada, desvela un mestritge del raconte, del suspens e de la sospresa finala que nos tenon de la debuta cap a la fin de l’òbra. Viatjam dins las nòvas tant coma dins lo temps o la complexitat del malhum d’internet e, fin finala, mai qu’un monde fictiu, es un rebat de nòstra realitat que nos es donat de véser. Una realitat borrotlada per las recentas innovacions informaticas, un monde iperconnectat que l’umanitat s’i pèrd, a l’imatge d’aquela maire « perfèita » que sagata sos quites enfants, presa dins lo cèrcle infernal de la societat numerizada. Una sciéncia-ficcion del temps cort, que nos parla de nòstre endeman pròche doncas e, d’aquel biais, nos parla de uèi e de nosautres.

Se d’unas nòvas tenon mai del fantastic, subretot dins la primièra partida del recuèlh, d’autras s’escapan clarament del costat de la sciéncia-ficcion amb de viatges espacials o d’invasions galacticas. Las influéncias son assumidas e los grands autors son citats en exèrgue, coma H.G. Wells o Frank Herbert, a costat de referéncias biblicas o classicas e, de còps, medievalas : pensam particularament a la citacion d’un extrach del Pichòt Thalamus de Montpelhièr qu’inspira un tèxte descriptiu d’una disseccion d’estranha creatura…

Las confinhas entre los sègles s’escafan e lo monde nos apareis, subran, dins son extraordinària absurditat. Çò mai espantant es lo trabalh sus la lenga d’òc que capita de dire, tot naturalament e sens artifici, aqueles univèrses ultramodèrnes. Los tèxtes explòran, a l’encòp, las termièras dels mondes e las possibilitats d’una lenga, las ànsias de l’umanitat e la fòrça de la paraula : Felip Biu i afirma, après la capitada de sa revirada de Lo qui marmusava dens l’escuranha, una pluma singulara. Ironia, tonalitat de còps comica e vision lucida e desencantada de nòstre avenidor son mesas al servici d’una pròsa condensada que raja, a desbòrd, plena de ritme e de mistèri. Lo legeire es emportat, sus las pesadas dels personatges, dins los corredors lusents e enfachinaires del laberint informatic que trebola nòstras identitats, o se retròba confrontat a l’alteritat totala, cara a cara amb l’aparicion d’una planeta viatjaira e novèla al bèl mièg del sistèma solar. E se pausa sempre la question essenciala : i auriá un sens escondut ? Sèm mèstres de nòstras vidas ? La fòrça d’aquelas sèt nòvas es plan aquí : dins lor capacitat a questionar nòstra libertat e a nos far seguir de percorses, rai, sovent tragics, mai de percorses de femnas e d’òmes que, a contra-sobèrna, van en delà de las simplas aparéncias.

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !