Qu’i vatz encontrar un autor deu quau coneishetz dejà, probable, ua partida de l’òbra. Ua creacion de mei anar mei adaptada (jòcs vidèo, bendas dessenhadas, filmes, serias) ; lo monde d’Andrzej Sapkowski. Aqueste nom ne’vs ditz pas arren ? Que’s pòt. Que coneishetz miélher, lhèu, lo Broishèr (o Witcher) Geralt de Riv, vertadèra estela de la fantasia contemporanèa e personatge principau d’aquestas benalèjas. Ça-vietz ! Gausatz passar la termièra d’un monde escur e contrapassar, dilhèu, la cara livida de la natura umana : lo Diu Negre que v’ensenharà lo camin.

Andrzej Sapkowski, qu’ei un autor polonés vadut a Łódź. Coneishut sustot entà la soa saga de fantasia, Lo Broishèr (Wiedźmin) publicat peu purmèr còp en 1986, que’vs perpausa tanben quauques novèlas e romans istorics, tribalhs ancorats au terraire polonés (trilogia ussita, 2002-2006). Per estar fantasia classica, las publicacions de las benalèjas deu Broishèr que son ligadas beròi a la mitologia eslavica e a la cultura polonesa, çò qui’u balha ua originalitat qui hè la soa escaduda.

Lo Diu Negre, que’vs presentarà purmèr, entà’vs har entrar en aqueste univèrs deus rics e diversificats, los romans, fondacion de la recepcion limitada au començar : de la purmèra publicacion en 1986, dab lo recuelh de novèlas Wiedźmin, dinc a la conclusion en 1999 dab La Dauna deu lac (Pani Jeziora). Puish, que passarà aus jòcs vidèo, adaptacions qui hasón conéisher peu monde aquesta òbra de las granas : dab las produccions de l’estúdio polonés CD Projekt (The Witcher en 2007 e The Witcher 2 : Assassins of King en 2011). Que s’i parlarà, plan segur, deu cap d’òbra de l’estudio, lo celèbre The Witcher 3 : Wild Hunt, sortit en 2015 e qui s’està ua referéncia deu genre peus ahuecats e ahuecadas deus jòcs de ròtle (JdR).

Fin finau, que parlarà lo Diu Negre de l’adaptacion cinematografica (l’unica dinc ara), e de las diferentas serias que vadón d’aqueth univèrs. Alavetz deu filme purmèr, realizat en 2001 per Marek Brodzki. De la seria, a la quau e’s gahè, en tornar adaptar la medisha istòria, e qui sortí en 2002. E fin finau de l’adaptacion dispausa sus la platafòrma Netflix, sortida en 2019, e dab la quau l’òbra d’Andrzej Sapkowski e va encontrar lo son public mei gran, dab la recepcion que sabem.

Lo Collectiu Diu Negre, que hasó la causida, entà contunhar la vòsta passejada peus univèrs de l’imaginari, de’vs presentar ua òbra de las impausantas. Un monde qui questiona adarron la nosta natura, las consequéncias deus nostes actes e de las nostas responsabilitats de cap ad eras : qu’espèra que s’i va escàder a ahiscar lo vòste curiosèr !

Lo Diu Negre que v’i espèra…