BOVINA
« Bovina » es lo títol dau film documentari (31 mn) mes en linha sus Occitanica per lo CIRDOC. Es la resulta d’un trabalh collectiu de Tè Vé Òc que recampèt leis imatges de sa còla de rodaires/montaires e fisèt a Miquèu Gravier lo montatge finau.
La Bovina es lo nom que prenguèron leis afeccionats de la Corsa camarguenca e deis activitats diversas que l’enròdan. Dins Gard, Eraut e Bocas de Ròse, lo buòu es lo rei dei fèstas. Veiretz d’imatges d’uèi subrebèus dau país de Camarga, de la corsa camarguenca e de documents ancians que meton en evidéncia una relacion magica entre l’òme e lo buòu sauvatge. Dempuèi l’origina dei temps s’enfrontèron aquelei dos. De traças demòran dins lei baumas rupèstras e dins l’arquitectura romana.
La corsa camarguenca fai partida deis espòrts regionaus. Es un espectacle unenc au monde. Pendant la sason taurina, de març a novembre, lei buòus son menats dins leis arenas. Son en pista per 15 minutas e lei rasetaires, esportius de nivèu naut, leis enfrontan e ensajan de levar leis atributs primats plaçats sus lei banas de l’animau. I a mai de 800 corsas per an. Una vertadièra economia existís a l’entorn de la corsa : abrivadas, bandidas per carrièras, ferradas dins lei manadas (tropèus), nombrosas a l’ora d’ara.
La fèsta votiva recampa la populacion que parteja la « Fe dei buòus », la passion comuna per lo buòu camarga. Lei gardians a chivaus menan lei buòus ais arenas o per carrièra. De filhas se vestisson dau costume d’Arle e son presentas per lei corsas grandas dei finalas. Lo debanament d’aquelei corsas es contrarotlat per la Federacion Francesa de Corsa Camarguenca (FFCC).
Es tot aqueste monde fòrça ric e especiau que podètz trobar dins lo film Bovina.
