LD BD

Un Diari novèl ! Aquel d’aquí sortís en una temporada malaisida, vos ne farem pas un dessenh. Esperam que nòstras paginas, confinadas amb atencion e teletrabalh vos regaudiràn coma d’acostuma. Encara mai que d’acostuma, qu’aqueste còp nòstra tematica es viva, fusanta, espetanta, imatjada : la benda dessenhada.

Pensàvem pas a la debuta vos esgaiejar l’embarrament amb un quicòm que podèm pensar leugièr. Pasmens se pòt ajudar…

Pensàvem pas tanpauc ligar la causa a la disparicion recenta de grands noms de la BD coma Claire Brétecher, Albert Uderzo, Juan Giménez, André Chéret o, mai pròche, Joan Claudi Pertuzé. Pasmens s’aquel numèro lor pòt far un (modèst) omenatge…

Aquel numèro especial bedeïstas èra previst de longa data e es l’òbra, dins son dorsièr central, d’estudiants d’occitan de l’Universitat de Tolosa – Joan Jaurés, amb l’enquadrament de lors professoras. Que sián aquí mercejat·da·s, per lo temps passat, las recèrcas e l’engatjament.

Plan segur, Lo Diari seriá pas res sens la còla cronicairitz que cridèt “ne soi !” e ne son quitament mai que d’acostuma. De qué tirar un retrach istoric e documentat, e a l’encòp intim e personal, del 9en art a l’occitana. Per vos acompanhar dins aquela lectura, seguissètz lo guida, mascòta temporària del nòstre magazine.

Enfin, o direm jamai pro : demoratz a casa (de BD) e mainatjatz-vos !