Seleccionar una pagina

Pensadas

0 |

Lo Diari – E dins 10 ans ?

Pro parlat del passat, parlem ara de l’avenidor ! L’an passat, tres jornalistas de l’agéncia de premsa Bloomberg imaginèron e escriguèron lor « Pessimist’s guide to 2028 ». Al programa per las dètz annadas que venon : l’esfondrament de las bancas e del sistèma financièr actual, remplaçats per de monedas numericas (coma lo Bitcoin) ; una guèrra comerciala en China causada per de condicions meteorologicas extrèmas ; la disparicion dels malhums socials Facebook, Twitter e Google, que lo web serà tant enaigat per las ‘fake news’ que poirem pas mai distinguir çò vertadièr de çò fals ; un conflicte generacional important que s’espandirà e aflaquirà Euròpa… Brèu, un avenidor que sembla negatiu e complicat…

Per contrar aquela vision un pauc negativa, nos caldriá puslèu imaginar un futur diferent, mai agradiu, una mena de « Guida optimista per 2028 ». En efièch, dins 10 ans, las tecnologias e lo numeric auràn tan progressat qu’aurem gaireben pas besonh de trabalhar. Veirem alara un grand remplaçament dels òmes per de robòts dotats d’intelligéncia artificiala dins cada mestièr. Los que contunharàn de trabalhar o faràn sonque per lor léser. Mas, serem totes al caumatge alara ? Non ! Aprèp la decennia, lo caumatge existirà pas pus, per çò que, efectivament, las bancas e lo sistèma financièr se van esfondrar, mas seràn pas jamai remplaçats per cap de nòva moneda. Los escambis se faràn siá per tròc, siá a gratis. Las guèrras comercialas auràn doncas pas cap de rason de se téner. Puèi, sens los malhums socials, las generacions se tornaràn trobar ensemble, comunicaràn, e aprendràn las unas de las autras. E amb un web completament desinformat, lo monde se virarà cap a de mejans d’informacion mai clars e benlèu mai fisables, coma los libres, las revistas…

E per Lo Diari alara ? En 2028, tot va plan per Lo Diari, puèi que la revista festeja sos 20 ans amb un grand concèrt organizat a l’Estadi de França (amb lo triò Cocanha, qu’es dins lo Tòp 3 de las vendas musicalas, aprèp lo grop Mauresca). La revista en version papièr resistís encara al tot numeric e s’impausa dins totes los quiòsques ! Cal dire que los actors, escrivans, e artistas occitans son mai populars que jamai. Malgrat una passa dificila pels musicians aprèp la lei de 2023 sus l’interdiccion de jogar de bodega dins los luòcs publics, d’unes se son reconvertits dins lo rap, d’autres dins la musica electronica, a mai se qualques grops contunhan d’organizar de balètis salvatges e illegals dins de cavas per subreviure. D’ara enlà, Lo Diari es un setmanièr de 72 paginas, amb una cobèrta facha de papièr brilhant e que lusís dins la nuèch. Lo nombre d’abonats quita pas de créisser, subretot dempuèi lo numerò sul tèma de « L’Intelligéncia Artificiala occitana », que s’es vendut a 50 000 exemplars.

Segur qu’aquela vision es mai optimista, e benlèu un pauc tròp utopista. Çaquelà, vos caldrà esperar 10 ans de mai per saber s’èra veridica !

A prepaus de l'autor

M’aboni !

Anóncia

Lo CalenDiari

Obrir lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !