Ven d’espelir lo 6en volum de l’istòria de la cosina catalana e occitana (Història de la cuina catalana i occitana) de Vicent Marqués a las Edicions Sidillà de la Bisbal d’Empordà.

Aqueste 6en volum testimònia de la regularitat del trabalh de Vicent Marqués e de l’editor qu’an per objectiu de publicar dètz volumes que seràn un cap d’òbra per la cultura occitana. Jamai s’es pas vist una tala soma a despart per Occitània de l’Histoire Générale du Languedoc dels monges Dom Devic e Dom Vayssette. Jamai una tala recèrca dins lo domeni cultural aqueste es estada menada amb tan de vam. E los volumes de Vicent Marqués devon èsser dins totas la bonas bibliotècas d’Occitània. Basta pas de parlar de cultura e de cosina sens aver aquestes joièls que Vicent Marqués fa remontar de fonts prigondas.

Las cosinas catalana e occitana son cosinas sòrres. Las relacions istoricas, lingüisticas e culturalas entre los dos grands territòris, e tanben lo fach de viure dins una tèrra amb un passat e de condicions climaticas que se semblan an butat a la creacion d’una de las melhoras cosinas del monde, amb de caractèrs pròpris que tre l’edat mejana se van trobar dins diferents receptaris e manuals ont se compilavan e se preservavan. Vicent Marqués a dedicat tota la siá vida a apialar l’istòria d’aquesta cosina. Dins aqueste seisen volum, nos dona de centenats de monografias, de recèptas de polalha, de conilh e de caça. Es que Vicent Marqués non solament nos explica las recèptas mas nos dona tanben l’istòria de las recèptas, e un estudi filologic, literari e cultural dels plats que fan lo còrpus de la cosina que partatjam, nosaus, femnas e òmes dels païses catalans e d’Occitània.