Seleccionar una pagina

Critica musicala

0 |

Djé Balèti – Pantaï

Patwa

Pantaï

Djé Balèti
Sirventés
L’Autre Distribution
Sortie numérique: 22/05/20
Sortie physique: 16/10/20
15 €

A l’anóncia de la sortida d’un album novèl de Djé Balèti, nos regaudissèm, que l’artista prepausa de disques totjorn mai originals. A l’escota capviram dins l’estrambòrd. Es una capitada. Lo disc es poderós, tradusís perfièitament lo vam dels concèrts. L’espina electrica portada per de ritmes embrueissats, mòstra aquí tota sa poténcia. A trobat la bona recèpta. Puèi lo groove de la lenga niçarda mena lo piment que relèva lo tot. Jeremy Courault, cantaire e menaire del grop afirma aquí lo seu gost per un rock ‘n’ roll mesclat d’estransi e d’espiritualitat tan coma lo de Jimmy Hendrix o de Led Zeppelin. Retròba sus Pantaï l’èime del mainadet qu’escotava embalausit los 33 torns de sos parents.

Es a Niça, coma totjorn, que Djé tròba l’inspiracion. Per Carnaval e la Mar Nòstra. Una Niça pantaisada que l’artista i espeliguèt e la daissèt bèl temps a. Çò interessant es çò que fa lo Djé de la mitologia niçarda. L’interprèta al seu biais e la brandís coma una arma contra « la realitat de l’agenda », la realitat d’un monde cagant, trop reglat e dissociat de la natura. Dins lo tròç Catarina, invòca l’esperit d’una legenda locala, Catarina Segurana, una bugadièra que rebutèt l’armada de Francés Ièr, en li demandant uèi de rebutar lo monde de la racionalitat.

L’album es clafit de referéncias a la mitologia pagana, per Djé Pantai es una arqueologia viventa del monde chamanic d’aquí. Sa quista espirituala, la menèt pas per America del Sud o Asia, mas plan aquí, entre Garona e Mediterranèa, per el, « sem assetats sus una espiritualitat fabulosa ». Djé Balèti explòra lo monde de l’irreal dempuèi d’annadas, e a la mena de Tolkien, que bastiguèt son òbra a partir de legendas britanicas e nordicas, crèa una musica e de paraulas inspiradas de legendas occitanas e carnavalescas. Carnaval conten tota la mitologia pagana perduda que fa l’èime dels albums de Djé Balèti. Ambe Moko, lo disc precedent, Djé Balèti aviá ja pausat per d’unas cançons la basa d’un ròck qu’òm poiriá dire chamanic ; aquí, la direccion se precisa.

Se Pantaï es dins la dralha de Moko, remarcam una evolucion màger dins la mestresa de l’enregistrament. Lo cantaire e artesan de sa musica mena lo grop cap a de sons mai prigonds e poderoses, amai fa sonar l’espina, lo seu instrument emblematic, coma jamai. L’espina, mena de guitarra fargada dins un cogordon, fa lo ligam entre las sonoritats de las musicas ditas « del monde » e lo ròck a la mena de Woodstock. Uèi, lo seu estil es installat, aquò li permèt « d’aculhir la creativitat dels autres ». Jeremy prepausèt un sòcle, frucha d’annadas de soscadissa e d’experiéncias musicalas, e amassa inventèron dessús. Es un disc mai collectiu que los precedents. Julien Jussey, al mesclatge, Menad Moussaoui a la bassa e Antoine Perdriolle a la batariá aderiguèron a l’univèrs falabrac del niçard, e i apondèron la lor pata. L’enregistrament se faguèt dins de condicions pauc costumièras : « los tres musicians amassa dins la meteissa pèça, e aquò càmbia tot ». Per Djé, an « jogat ambe las meteissas sensacions qu’al temps d’un concèrt ». E o cal dire : son en plaça ! En mai de la bona recèpta, ten aquí la bona equipa. D’unes presas de son se faguèron en un còp, pròba d’una assegurança rara. Se se posquèron permetre aquel biais mai brut d’enregistrar, es que fan virar las cançons de l’album dempuèi mai d’un an sus l’empont. E aquel tresen album sembla l’abotiment d’un trabalh de 20 ans.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !