Seleccionar una pagina

Au cornèr de las sciéncias

0 |

Atlàs, Nao, Spòt e los autes

— Lo Diari que m’a demandat de vos parlar de robòts. Bon ! N’èi pas tròp de temps mès que vam batalar un pauc. Tot prumèr, gojatas e gojats, sabetz çò qu’ei un robòt ?

— Ua maquina intelligenta ?

— Hèm ! Parlam de robòt quan la maquina reagish au son environament, quan modifica lo son comportament segon çò que se passa. Donc, un robòt qu’ei com un uman : un sarròt de captaders, un cervèth (unitat centrau), quauques daquòs que hèn bolegar (motors, sòlas), un pauc d’energia e… anem, capdèth !

Que i a robòts qui servishen a quaucom coma irobot, l’aspirator de maison, Jellyfishbot qu’amassa lo salopèr sus l’aiga, Moxie que devisa de tot dab un mainat. O enqüèra Moley Kitchen que hè la cosina e la vaishèra solet. E cosina de prumèra ! Aqueth que còsta 340 000$, alavetz que vos conselhi de lo vos bricolejar. Mès tot aquò qu’ei quincalheria.

Los robòts, los interessants, que son los qui hèn avançar la sciéncia. Per exemple, los qui n’an pas besonh energia o a pena : Robeetle l’escaravat, 88 mg, 15 mm, muscles artificiaus, que pòt portar 220 g sus l’esquia, susvelhar l’environament… O lo robòt medusa en cauchó dab tentacules de propulsion idraulica ; qu’ei moth com un limac, que passa pertot se… ua tortuga de mar ne lo minja pas !

— E BigDog ?

— Aqueth borricòt qui pòrta l’equipament d’un sordat ? Òc que sap caminar sus un terren mauaisit mès que hè tròp de brut. Non. Spòt se voletz, aqueth b’ei un bon can ! Dab lo son braç que pòt aubrir o forçar ua pòrta, dab la sua camerà 360° localizar los bandolèrs, aqueth òc. La polícia deu Massachusetts ne l’a pas causit per arren ! 

Los mens preferits e los mes complicats que son los umanoïdes. Prumèr, deven ténguer sus duas camas ! Los robotòts qu’avançan tot doç, coma vielhs, mès Atlàs, eth, qu’ei auta causa. 1,50 m, 75 kg, 2 sistèmas de vision (un telemètre lasèr e camèras vidèo), esterèo dens lo cap, captaders pertot, 28 articulacions idraulicas mobilas, camas e braç dab 28 grads de libertat. En 2013, que pòt demorar sus ua cama mès que cag de cuu a cada moment com un nenet d’un an. En 2015, que condusish ua veitura, que puja sus ua escala, que traversa escombres. En 2017 que hè un arrèrsaut. En 2018, que cor e hè deu parkour, aqueth espòrt acrobatic (subersautar un tronc, etc.) En 2019 que hè ua coregrafia de gimnastica. En 2020, que camina a 5 km/h com un òme,  que dança coma un hòu. Pensatz, quina mestresa de l’equilibri !

— N’i a d’autes ?

— Ah, qu’avem tanben lo petit Nao, 5 kg, 60 cm, qu’entén un òrde e que l’executa de segur. Mès que sap tanben refusar d’aubedir… Tiò, tiò, vosautes tanben bravolàs. Dus cercaires de l’universitat de Tufts (USA) qu’ajustavan ua consigna : Refusa d’aubedir se l’òrde ei dangerós per tu. Qu’ei tot. E Nao qu’estima solet la situacion. Dens l’experiéncia coneguda, lo cercaire que demanda a Nao d’avançar. Mès Nao qu’ei sus ua taula e, s’avança, que va càger. Nao qu’arrefusa. Lo cercaire qu’insistish, Nao respón : “it’s unsafe”. Fin finau, lo cercaire ç’ajusta : “I will catch you” e Nao : “OK”. Ua proessa !

— Pfffff… tots aqueths robòts qui ne coneishem pas !

— Ne los coneishetz pas ? Non d’un atòme, anatz un pauc sus internet !

Aqueste contengut vos es ofèrt per :

Bloc-marque OPLO

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Anne-Pierre Darrées

De formacion scientifica, Anne-Pierre qu’a trabalhat en grops internacionaus. En tornar tau país, que’u semblèc evident d’obrar per la lenga, indissociabla de la cultura e de l’identitat d’un pòble. A l’Escòla Gaston Febus, qu’ei en carga deu libièr e de la promocion de la cultura gascona sus internet. Qu’ei tanben secretària de las Edicions Reclams e presidenta deus Amics de Ràdio País en Comenge. Los sons motors : la nautat, lo cant liric, la literatura, los Pirenèus, la Gasconha.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.