Seleccionar una pagina

A Taula !

0 |

La mongetada

Es un plat tipic del sud-èst pirenenc d’Occitània : Comtat de Foish, País de Saut, Fenolhedés, Corbièras, Menerbés, Cabardés, País Masametòl e Castrés. Sembla al famós caçolet. Es una caçòla de mongetas (las mongetas mai estimadas son las de Pàmias) amb carn de pòrc e confit d’auca.

Ingredients

350 g
de mongetas

300 g de costelons de pòrc

100 g de codena
de carnsalada

alhs

4 salsissas

4 confits d’auca
o de guit

1 ceba

3 tomatas maduras

grais d’auca

sal e pebre

Preparacion

D’en primièr pelarem e atalhonarem la ceba e tres o quatre grans d’alh e abocinarem las tomatas. Puèi, trocejarem la codena e los costelons. Botarem doas culheradas de grais d’auca dins una caçòla de tèrra e la pausarem sul fòc doç. I ajustarem la ceba e l’alh e o farem rossir. Remenarem amb lo culhèr de fusta e, quand serà daurada la ceba, i ajustarem las tomatas. Remenarem de temps en quora e i ajustarem los costelons, la codena e las mongetas (qu’aurem daissadas conflar a l’aiga se son secas). I metrem una mica mai d’aiga que la que cal per cobrir e farem fòc. Salpebrarem e, al bul, baissarem la flama e o daissarem bulir a fòc suau tres a quatre oras ; se cal, i ajustarem una mica d’aiga cauda de tant en tant. Mentrestant, metrem una culherada de grais d’auca dins una padena sul fòc pas gaire fòrt. Quand lo grais serà caud, i metrem las salsissas e las rostirem. Remenarem amb lo culhèr de fusta e, quand seràn dauradas, las tirarem e las reservarem. Mièja ora abans de tirar la caçòla de pel fòc, i ajustarem lo confit e las salsissas e las enfonsarem un pauc. Quand tot serà còit, o servirem dins las sietas.

Variantas

S’i pòt metre una salsissa de fetge (trocejada), un garron de pòrc, un òs de cambajon, de fuèlhas de laurièr o un parelh de clavèls d’olor, d’api, un pè de pòrc e un ramèl de farigola. D’unes càmbian la salsissa per d’andolhas (salsissa de codenas). D’autres fan còser la mongetada al forn.

A prepaus de l'autor

Vicent Marqués

Vicent Marqués i Carbonell es nascut en 1950 al País Valencian. Cosinièr de profession (ara retirat), li agrada tanben escriure, e far de recèrcas. Quaranta ans fa comencèt un trabalh antologic e istoric de la cosina occitana e catalana, un trabalh menimós fòrça documentat que qualques tòmes ne son ja sortits. Vicent escriviá ja dins Jornalet, per Lo Diari liura una recèpta, de bon far, totjorn plan rensenhada sus tot lo territòri, amb l'ajuda de Joan Tomàs.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !