L’art del partatge o los tresaurs amagats d’Occitània
Cada an, las Jornadas europèas del patrimòni meton en lum una tematica particulara. La que foguèt causida per aquesta 35ena edicion, que se debanarà los 14, 15 e 16 de setembre dins Euròpa tota, es particularament significativa pel CIRDÒC e cara a la cultura occitana al sens larg : s’agís de « l’art del partatge ».
Partejar, es metre en comun la memòria de cadun, per bastir un patrimòni que nos concernís totes.
A aqueste títol, lo CIRDÒC lança Pas Jamai Vist, a l’encòp exposicion e apèl a collècta. Explorant los camps inedits del patrimòni cultural regional, l’operacion met en lum de documents malconeguts per enriquesir la memòria collectiva de nòstra region sus las cinquanta darrièras annadas : filmes de vacanças, archius visuals, fotografias testimoniant dels eveniment socials o culturals… L’apèl a contribucion es doncas lançat ! S’avètz d’imatges qu’illustran la vida locala, sètz calorosament convidats a venir participar a la memòria collectiva en depausar vòstres documents, que seràn numerizats sulpic e vos seràn tornats acompanhats de lor còpia numerica. Las tematicas privilegiadas concernisson tant las lutas socialas coma las tradicions festivas, las culturas agricòlas e la transmission orala. Brèu, tot çò que fa encara a l’ora d’ara la vida culturala occitana.
Es dins aqueste esperit qu’arribèt al CIRDÒC, per exemple, lo fons Mazars, fons d’una familha audenca qu’illustra tant per de fotografias coma per de vidèos, lo mòde de vida e las tecnicas agricòlas d’una familha audenca entre las annadas 1910 e 1970.
Mai recentament son los archius de la revista La Beluga de Limós, revista audenca activa pendent gaireben quaranta ans, o aqueles del CREO (Centre Regional de l’Ensenhament de l’Occitan), associacion que recampa d’ensenhaires e de parents d’escolans de l’ensenhament public, que dintrèron dins las colleccions del CIRDÒC.
Partejar es tanben faire descobrir
Un apròchi novèl de l’istòria occitana contemporanèa es a mand d’espelir gràcias a un partenariat entre lo CIRDÒC e l’Ina (Institut nacional de l’audiovisual) : desiroses de portar al grand jorn – e al mai grand nombre ! – las pepitas embarradas dins los archius televisuals, las doas institucions s’assòcian per crear una platafòrma interactiva en linha a l’entorn de cinquanta annadas d’istòria sociala, culturala, artistica e politica vistas al travèrs del prisme de l’occitan e de la cultura occitana. Vertadièr punt de dintrada dins la lenga e la cultura « òc », aquesta fresca entièrament bilingüa, fruta d’una collaboracion entre lo CIRDÒC, l’Ina e lo mond universitari, s’apiejarà suls fonses d’archius de la television publica per documentar de tematicas variadas. Mesa en miralh amb l’enciclopèdia numerica Occitanica, es una ofèrta unenca que se dessenharà sul wèb, per metre a la portada de totes la lenga e la riquesa culturala occitanas.
Los archius vidèo al CIRDÒC son a l’ora d’ara nombroses e alimentan d’espectacles de creacion contemporanèa. Los filmes del fons Michel Cans, qu’illustran lo mòde de vida de Besièrs e del besierenc dins las annadas 50 inspiran dempuèi 2016 l’espectacle Chronos del grop Asuelh.
Retrobatz dos eveniments Pas Jamai Vist per las jornadas del patrimòni de 2018 !
E de qué seriá lo partatge sens l’esperit de transmission ?
Transmetre una emocion, un remembre, una lenga, es çò que fa Alain Fornells amb sos Meubles Modestes, que seràn expausats al CIRDÒC los 14 e 15 de setembre. A mièg-camin entre lo mòble e lo joguet de fusta, caduna de sas òbras es faita de materials recuperats, reïnventats, que son tantes testimònis d’un « quotidian meravilhós » tot dreit sortit de la memòria e de l’imaginacion de son creator. Per çò qu’es de Michel Fournier, ancian professor del licèu Enric IV de Besièrs, se propausa de faire profeitar cadun de son erudicion per transmetre una vision diferenta de l’istòria de Besièrs, per l’evocacion de moments malconeguts que, pasmens, faguèron data.
![[kosmopoli:t]](https://i0.wp.com/medias.lodiari.com/Kosmopolita_reduit.jpg?resize=440%2C264&ssl=1)
