Una Calandreta, una tombòla, una guitarra e Francis Cabrel
Lo monde de la pichona Calandreta de la Dauna a Peçac (Gironda) nos mandan una informacion que, ne sèm segurs, poirà interessar los qu’aiman la musica, Francis Cabrel, e que vòlon sosténer las iniciativas en occitan !
O sabètz, la crisi sanitària se paga car per d’unas estructuras. Per una escòla associativa coma la Calandreta de la Dauna, de pas pus poder far d’eveniments aquò grèva lo budgèt e doncas empacha d’aculhir de dròlles novèls dins l’escòla en occitan.
Mas aquí an trobat un autre mejan : se tròba que demest los parents d’escolans i a Florian Thomas, laütièr de profession. Es anat demandar son sosten al cantaire Francis Cabrel, que sabèm ara estacat a la lenga occitana (la canta de mai en mai), e a Joan Bonafon de Peiraguda.
Florian Thomas a doncas personalizat una guitarra Lâg amb una crotz occitana, e l’a facha dedicaçar al cantaire astafortés. Serà doncas un prèmi de valor per una tombòla per l’escòla, virtuala per la fòrça de las causas.
Mas los lòts de ganhar s’arrèstan pas a aquò ! En seguida d’un bèl vam de generositat, son plan d’artistas en ligam amb l’occitan qu’an respondut a la sollicitacion de la Calandreta de la Dauna : The Inspector Cluzo, Nadau, Les Ogres de Barback et le Bal Brotto Lopez, Peiraguda, los labèls de musica occitana Pagans e Sirventés, e tanben Macca music e l’especiariá en linha lescadetsdegascogne.fr.
Doncas de polits presents, al servici d’una bona causa !
👉 Los bilhets de la tombòla son en venda sus Hello Asso entre lo 1èr de decembre de 2021 e lo 9 de genièr de 2022. L’anóncia dels premiat·da·s se farà lo 15 de genièr de 2022.
