N’ei pas causa navèra, mes per cas qu’un praube innocent, per brave e entresenhat que sia, ne n’aja pas enqüèra audit mot, que la ve vau tornar contar, l’istòria.
Mes abans d’aquò, que’m cau balhà’vs un encastre entà que posquiatz compréner de qué e voi parlar. Ne seretz pas shens saber la novèla, trista per daubuns, inscriuta en lo briu naturau de la vita per autes, que lo grope biarnés Artús a anonciat que lo libe deu lor periple que s’anava barrar a la fin de l’annada. Que’vs rasseguram : ne’n son pas enqüèra a l’epilògue, qu’an tostemps beròis capítols de concèrts ad escrivejar.

L’istòria, que l’averatz comprés, qu’ei la d’aqueth grope de musica. Ne’n diserèi pas l’estile, permor ne s’i limitan pas. Ne’n diserèi pas l’epòca, permor que lo temps que’us a vist a gessir de las soas hitas. Mes l’istòria vertadèra, que son eths qui la ve conteràn.
“Quan ? On ?” ce’m demanderatz.

Si soi jo qui v’at disi, que i a chanças que’s tròbe sus ÒCtele. Desempuish 2020, d’alhors. Enfin, ne voi pas estar egoïsta, e que v’at marmusi a l’aurelha qu’i ei quitament sus TV7 Bordeaux. Hètz-ne córrer lo brut autan com volhatz.
B’at cau díser totun que per nosauts tanben que n’ei estat tota ua istòria, aqueth film ! E n’èram pas sols ! Produccion deus Arcaishonés de Prismédia, coproduccion de nosauts d’ÒCtele plan segur, coproduccion deu CIRDOC – Institut Occitan de Cultura tanben, participacion de TV7 Bordeaux e deu CNC, sostien de la Sacem… Los autors-realizators Sonia Moumen e Alexandre Cartigny que n’an vist a passar, monde ! E aquò shens comptar los detzenats d’intervenents (o mei) e los quites membres deu grope ! Qué credètz ? Que calè plan totas aqueras tropas entà dar la lutz ad aqueth hòrt beròi documentari de 52 minutas qui v’inviti ad espiar tranquillòts a casa, en pujant un drin lo volume deu hautavotz per’mor, si n’i a d’a véder, que’vs podetz plan imaginar quant n’i a ad escotar !

Qu’avetz comprés, ce pensi : per l’istòria sancèra, rendetz-ve sus ÒCtele !