L’IEO es l’actor fondamental de la difusion de produches culturals en occitan. Representa gaireben la totalitat de las librariás especializadas : de Lemòtges a Tolosa, Vilanuèva d’Òlt a Gap en passant per Besièrs e plan d’autras coma Rodés.

La librariá del CCOR se tròba plaça Fòch al còr de Rodés. Melissanda, la salariada de tria, vos aculhís del dimars al divendres de 10h a 13h e de 14h a 18h. La botiga possedís mai de 2000 tresaurs, de l’obratge especializat a las darrièras parucions en passant pels classics. I traparetz de tot, libres, CD, DVD, vinils, e totas menas de goodies occitans.

Totes los genres literaris son presents : romans locals e d’endacòm mai, poesia, teatre, BD… Totes los dialèctes son presents tanben ! E un taulièr pedagogic consequent vos espèra.

La literatura pels joves abonda : contes, faulas, BD, fantastic… d’albums plan sovent acompanhats de traduccions e de CD. De libres magnifics en papièr copat rejonguèron las laissas i a gaire per far somiar pichons e grands. De cançonièrs, de CD de comptinas o de bals, e mai de DVD per aprene a dançar son disponibles ; tanplan coma fòrça dessenhs animats e documentaris pels enfants e pels adolescents.

Cada mes, d’animacions pels joves son organizadas per sensibilizar los mai pichons a la lenga e a la cultura pel biais de la lectura, del cant e de la dança.

La botiga existís tanben en linha sus www.ccor.eu, prepausa totes los produches del Diari.