Seleccionar una pagina

Fotomatòn

0 |

Marge Galvez

Marselhesa en charradissas, la Marge Galvez que hè partida de l’equipa de la companhia deu Lamparo. Curiosa, valenta, generosa e creativa, atau las qualitats d’ua hembla qui graseish a crear de qué partatjar en cosina, en imatge et preus internets. Comunicaira a hum, qu’ei estacada a la vila occitano-foceana, que nse’n conta çò qui s’i viu.

Quau ei lo ton percors de vita, qui t’a hèit arribar dinc ací ?

Ai un gost segur per lei lengas e la dubertura ais autrei culturas. Siáu arribada a Marselha en 2000, e ai rescontrat lo Massilia Chourmo. I ai aprés qu’ambe tres còps ren e un pauc de volontat collectiva, si pòdon far de grandas causas. Aquò mi botèt lo pè dedins, faguèri de rescòntres, l’associacion Mic Mac, puei Manivette Records. Mi siáu formada a la comunicacion, a la regia. Aimi charrar, tèissi de lònga de liames que mi fan avançar dins mon trabalh. De fieu en cordura, trabalhèri ambe Guilhem Lopez, puèi leis Ogres de Barback que cercavan quauqu’un per son blòg de virada. Faliá redigir, crear de visuaus, manejar l’interfàcia web… E mai se son pas de musicas qu’escoti, trabalhi per d’estructuras ai valors pròchas dei mieunas, que carrejan una singularitat.

Marselha, qu’i ès installada dempuish vint ans, juste. Qué çò qui’t religa tant ad aquera vila ?

A Marselha, i a una pluralitat que fai que pòs èstre tu. Decides d’èstre marselhés. Que siagues fiu/filha d’italians, d’armenians, qu’agues un accent ponchut… Ti jutjan pas. Siáu nascuda en region parisenca, arribèri en Bocas de Ròse a 9 ans. Aguèri un còp de còr per Marselha. I a pas de juste mitan : aimes ò aimes pas. Ieu, aquò m’arrapèt. Ai sentit un vertadièr apòrt d’una consciéncia militanta : aparar la lenga, obrar per lo collectiu creòle, far lo Carnaval de la Plana… De bèleis accions ciutadanas que condicionan de chausidas. Marselha pausèt lei basas de çò que siáu e vòli èstre.

E l’occitanitat de Marselha, quin s’exprimish ?

Malaisadament, diriáu. Lo fach que i ague fòrça culturas escafa lei culturas. I a fòrça luecs comuns folclorics, e ai l’impression que vivem pas d’a fons nòstra occitanitat. E pasmens es pertot. A l’estadi velodròm, parli occitan ambe de gents, ieu la pichona parisenca ! Marselha a l’occitana, la vivi per aquela consciéncia d’una vila qu’a 2600 ans d’istòria, ben luenh de « nos ancêtres les gaulois ». E son lei marselhés sortits d’autrei culturas que nos fan nos contar e nos bastir.

Qué son las toas autas passions o creacions ?

Diriáu l’OM… e lo manjar ! Siáu vegetariana, tendéncia vegana. M’agrada aquesta quimia magica, aquò me pivèla. Me regali de cosinar per partejar. Ai tanben una passion mai egoïsta : lo pegatge. Per m’amaisar, me pausar, sortir çò qu’ai dins la tèsta. Preni de vièlhs magazines e ne’n fau de composicions folastras, inspiradas deis annadas 60. Es mon exutòri. E ara, expausi.

E quina musica escotas quan e’t lanças hens la creacion visuau atau ?

Proud Mary (Ike & Tina Turner), comença suau e part en fum, coma ieu quand fau de pegatge ! Solèu d’argent (Uèi), pausat e poderós. Even on the Worst Nights (Mixtapes), de punk a rodetas per se brandinejar. Es eclectic !

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !