Seleccionar una pagina

Al rajòl del temps

0 |

Le teatre dels Galejaires

Es a se demandar cossí vuèi le teatre, que de mès en occitan, pòsca arribar a se fèr una plaça, tant menudeta siaga, demest les lésers e passatempses pletorics e envaïdors que coneguèm. Vaquí coma exemple l'aventura de la còla de teatre de l'IEO d'Arièja.

Tot debutèc per un concors d’escritura que le president de la jurada n’èra le comedian Ives Durand. I fusquèc premiat le tèxte d’una peçòta titolat La gata de la Barona prealablament corregit per Guy ChauffourProvisor de mestièr, li devèm l'apellacion « Antonin Perbòsc » del collègi d'Autariba (31). Aqueste passionat de teatre e d’occitan prepausèc a l’IEO de margar la pèça e s’imaginèc de ne fèr la mesa en scèna.

Atal nasquèc la còla dels Galejaires. Qualques meses apuèi le paure Guy se morisquèc, mas per respectar son vòt caliá que la pèça se joguèsse al mens un còp. A la martronada 2014 fusquèc la primièra dins un vilatjòt… la sala modèsta s’averèc tròp pichona ! Una escasuda inesperada que seguisquèron 56 representacions e pus tard tres autras pèças.

Les Galejaires son benevòls, viran sens cap de subvencions, emai d’unes i daissan fòrça moneda per n’assegurar la tecnica e la logistica ; tota la collècta es balhada a l’IEO 09. Amators de segur, cèrcan pas de plagiar un teatre sofisticat. Sens pretencions brica mas serioses e aplicats trebalhan fòrça per arribar al melhor. Sustot qu’a l’encòp del jòc, la projeccion de la traduccion francesa permet pas la mendra error !

Per sos tèmas, aquelas pèças son d’inspiracion rurala, un pauc a l’imatge del teatre païsan que, temps a, animava las campanhas. S’abeuran de la vida rurala actuala, sos còdis, son originalitat, sas mòdas… Amb comic e pertinéncia, botan en scèna las nombrosas relacions umanas sovent exacerbadas per l’isolament de la campanha. S’i parla dels sicuts actuals, le cambiament de populacion, le rapòrt a las bèstias, le vielhum, la societat de consomacion…

I cal véser al delà de comedias, un acte militant per fèr viure la lenga e ne fèr restronhir sa musica. Cap de replicas en francés, tot i es declamat dins le parlar natural de Pàmias (le qu’ètz a legir) que se compren un pauc pertot e se pr’en cas i a totjorn le secors de la traduccion simultanèa. Las quatre pèças fan ausir la riquesa del vocabulari, les imatges tan nombroses dins le parlar païsan, le cant de las conjugasons, les viralengas…

Es pas un teatre universal ni un espectacle de massa ! Çaquelà al jorn de vuèi las quatre pèças an amassat 7 490 espectators per 121 representacions siá una mejana de 62 espectators per representacion. Agradan mès al public dels vilatges e la comunicacion de pòts en pòts tusta pas o pauc las rets oficialas.

Mas tot es pas de planièr, trobar jogaires es pas aisit e que’n pus mestregen un tant siá pauc la lenga es pièger. Les joves mancan tanben, es de plànher ja que porián assegurar l’avenidor de la còla que senon, tard o d’ora risca de s’amortar.

Arribe çò qu’arribe, demorarà per totes les Galejaires una crana aventura.

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Alan Vidal

Nasquèri en 1950 dins un vilatjòt de la plana de Pàmias dins una familha de païsans. Professor d'agricultura a Rodés, Ondas e Ausevila. Locutor natural, ensagèri d'escriure en lenga nòstra tre ma retirada, novèlas, articles, cronicas, pèças de teatre...

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...