Seleccionar una pagina

Eveniment

0 |

IEO Eveniments : La Janada d’Albi

La Janada

La fèsta de Sant-Joan fa pensar d’en primièr al fuòc, a la Janada (o Joanada), una tradicion mai que vièlha que cadun sentís e interprèta a son biais. Sant-Joan simboliza pels crestians lo batisme, moment primordial de la vida ; pas estonant que se festege aquel sant lo jorn del solstici d’estiu, lo jorn lo pus long, que lo solelh es al pus naut dins lo cèl e la nuèit la pus corta. Pels que lor demòra un pauc de paganisme vièlh, es la fèsta del solelh, de la feconditat, amb de rites de proteccion de totas menas, per las recòltas a venir, contra lo maissant uèlh e autres emmascaments, per se parar de la malautiá e te sabi qué mai. Es la fèsta de la debuta d’estiu, una fèsta que se debana defòra, a la nuèit, dins la calor : jòia, danças, e dins l’escurina, tant plan, rescontres amoroses.

La Ressèga

August Fourès assòcia a la Sant-Joan l’instrument de musica emblematic de la Montanha Negra e del Lauragués, la bodega, que mena la fèsta. Utiliza pels fuòcs de Sant-Joan un mot qu’es pas dins fòrça diccionaris, los flairons. Quand escriu : « tot flaira, ramas, brancs, agadèus e ginèsta », òm vei la flamba mas òm pensa tanben, amb lo doble sens de flairar, a la nolor agradiva del fuòc.

Los fuòcs sus puèges e montanhas son per Fourès de farfadèls sortits de las tombas dels albigeses mòrts del temps de la Crosada, un biais de se remembrar nòstra istòria dolorosa.

La catedrala d’Albi foguèt bastida, se ditz, dins un contèxte de remission dels erètges catars. Es al pè d’aquel monument que, dempuèi 1974, los occitanistas albigeses alucan una Janada virada tota cap a la lenga e a la cultura occitanas.

Dempuèi dos ans, la vila d’Albi decidiguèt d’ajudar mai a valorizar aquela tradicion, e amb lo sosten del departament de Tarn e de la Region Occitania Pirenèus-Mediterranèa (Total Festum), en mai de la fèsta coma foguèt de temps, i a tanben de concèrts : Du Bartàs en 2018, Moussu T e lei Jovents en 2019…

Al programa : a quatre oras e mièja la fèsta comença amb la ressèga, una dança collectiva de tipe farandòla dins las carrièras de la vila segon l’anciana costuma del sègle XVIen. I participan los enfants de las escòlas occitanas bilingüas e associativas, amb lo grop Sonaires d’Òc e una dançaira professionala. Entre sièis oras e sèt oras, balèti amb lo grop Jòi Orquèstrad. De sèt oras a nòu oras, auretz lo mercat de nuèit per manjar un pauc e vos repausar, sus la plaça de la Pila, e i aurà una mesa en valor dels produches amb d’etiquetas en occitan fachas pels enfants de las escòlas occitanas.

A nòu oras, lo grop Moussu T e lei Jovents nos menarà la musica de la vila de La Ciutat !

E après, coma cada annada, veiretz lo cortègi dels enfants de las escòlas occitanas amb los flambèus, e darrièr eles los consuls (membres del conselh municipal, parents d’escolans e associatius) en rauba tradicionala del sègle XVen. Lo cortègi anirà de la plaça del Vigan a la plaça de la Catedrala en passant per las carrièras Timbal e Mariès, e serà acompanhat del grop Sonaires d’Òc. Ausirem la paraula dels cònsols, e quand eles o ordenaràn, los enfants alucaràn lo fuòc. La serada contunharà amb Jòi Orquèstrad e lor balèti duscas a mièjanuèit.

 

Una fèsta de pas mancar !

Per mai d’informacions : Centre Cultural Occitan de l’Albigés

28 rue Rochegude 81000 ALBI

05 63 46 21 43

centre-occitan-rochegude@orange.fr

A prepaus de l'autor

Lo Diari

Aquel compte es bailejat per tota la còla de redaccion del Diari. Es aquel compte que s'ocupa dels afars corrents sus aqueste site e s'encarga de la publicacion dels articles.

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !