Seleccionar una pagina

Teatre

0 |

Lo Lop es mòrt – Los de Ròcaguda

Tot bon occitan coneis l’istòria de la mòrt del lop Simon de Montfòrt, tuat per una pèira lançada per las femnas de Tolosa, del naut de la muralha. La còla de teatre del CCOA (lo Centre Cultural Occitan de l’Albigés), Los de Ròcaguda, nos prepausa sa version de l’istòria amb aquela polida pèça de teatre, Lo Lop es mòrt.

Los 11 actors de la pèça son de benevòls apassionats pel teatre e per l’occitan, que jògan amb plaser jos l’agach de Michel Tayac. Es el que dirigiguèt e aprestèt una mesa en scèna trabalhada pendent de meses de repeticions intensas. En efièch, dins la remesa de las repeticions, lo decòr es ja en plaça : la pèça se jòga sus una placeta del costat de la pòrta Montoliu de Tolosa. Al fons, los ostals tolosans son pintrats sus doas telas grandas, e de bancs son installats davant aquelas davanturas. A man esquèrra, la muralha es impressionanta. Dins un canton de la remesa, los accessòris, prèstes a èsser utilizats : los arcs e las sagetas fargats amb de brancas, l’escampador e son topin per mandar « la sopa » suls enemics, la carriòla emplenada de pèiras (en carton) e la granda peirièra de fusta.

Caduna de las 7 scenetas d’aquela « farcejada istorica » conta un eveniment, de la debuta de la Crosada contra los Albigés en 1209 fins a la mòrt de Montfòrt en 1218, sens oblidar lo massacre de Besièrs, la batèsta de Muret, l’exili dels comtes de Tolosa, lo sèti de la vila…

Cada episòdi es viscut del punt de vist de la populacion, amb de parelhs de personatges divèrses : lo mercand, lo tavernièr, lo carretièr, e lors femnas, mas tanben lo fustièr, la bugadièra, e, enfin, Pèire, lo vailet del comte Ramon, e son amorosa, la Guilhemeta. An per costuma de se recampar totes sus la plaça, lo ser, al pè de la muralha, per parlar de tot, amb fòrça de seriós mas totjorn amb umor. Un darrièr personatge, lo trobador, nos legís d’extraches de la Canso entre doas scenetas, e nos permet de seguir l’avançament de la pèça. Plan segur, totes los dialògs son contats en occitan (e son sostitolat en francés), levat la banda sonòra enregistrada que nos revira en francés qualques extraches de la Canso.

Los personatges, puslèu passius dins la primièra partida de la pèça, van lèu venir d’actors màgers de l’istòria de lor vila dins la darrièra sceneta. Los franceses arriban al pè de la muralha e començan d’atacar lo sèti. De l’autre costat, tot lo monde s’activa, cadun coneis son ròtle, e, aprèp un escambi de sagetas entre los dos camps, apareisson las doas armas màgers, l’escampador e la peirièra. Dos accessòris que semblan d’armas vertadièras, tot de fusta, e subretot, vertadièrament foncionalas ! Serà lo darrièr tir de la peirièra, activada per las femnas, que marcarà a l’encòp la fin de Montfòrt e de la pèça. Las femnas, qu’an, dins la pèça coma dins l’istòria, un ròtle important, s’insurgiràn aprèp l’anóncia de la mòrt del Lop pels franceses : « Eles ? Non pas ! Elas ! ».

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Emilie Bosc

Emilia es una anciana estudianta d'occitan de l'Universitat de Tolosa 2 Joan Jaurés. Originària d'Avairon, trabalha actualament pel Centre Cultural Occitan d'Albigés. Foguèt estagiària e servici civic al Diari, ont se prenguèt de gerir la comunicacion e d'escriure d'articles, çò que contunha de far.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.