Caricaturas de devinar
Ja la dintrada… a passat pro lèu aqueste estiu ! Es ja ora de se tornar metre al trabalh, als estudis, de complir los devers socials, familials o professionals… existís una possibilitat de s’amusar encara un pauc ? De contunhar de jogar en familha o entre amics ? Sospechatz qu’ai una idèa a vos prepausar… E òc, avètz rason, e aqueste còp, serà una mena de libre-jòc. Bon, siam onèstes, a un defaut, aqueste libre : es escrich sonque en francés… Mas a l’incommensurable avantatge de vos far descobrir d’un biais original 40 personatges nascuts en region Occitània que son estats revelats dins las arts, la literatura, los espectacles, los espòrts o encara la politica… Per vos donar una idèa, prengam un exemple… a l’azard, de segur, me fasètz fisança… Alara vaquí a la pagina 16, los indicis que podèm trobar (la revirada es de ieu) :
- Nascut lo 22 d’octobre de 1921 a Cette, comuna del departament d’Erau.
- Poèta, autor, compositor, interprèta.
- Sa maire es una catolica d’una granda devocion.
- Recebèt lo Gran Prèmi de Poesia de l’Acadèmia Francesa en 1967.
- Diguèt : « N’essent pas tròp un con de natura, capitavi jove a destriar un bon tèxt. »
S’avètz pas trobat, vos podètz ajudar de la caricatura qu’acompanha cada devinalha del libre. Son de Devo, un dessenhaire occitan que trabalha per de jornals coma La Dépêche, lo Midi Olympique o encara de jornals satirics.
A lèu a la Tuta !
