Seleccionar una pagina

Critica musicala

0 |

Bourrasque

Que son joenas, talentuosas, vitècas e inventivas. E qu’an de segur quauquarren a portar aus emponts e parquets de bals. E pas sonque. Bourrasque qu’ei l’encontre de duas musicairas – Elisa Trebouville e Marthe Tourret – au vriolon, banjo, pifres e vutz, atraçant au demiei de las borrèias de casa, repertòri de las montanhas Apalaches e de Loïsiana. Que’s sòrten lo permèr disc lo 13 de mai de 2018 a Tolosa, e arrapatz-ve, qu’an seguida en las ideas e un aviéner prometedís.

Tot encontre frutèc que s’amerita ua introduccion sus la genèsi que’u hasó vàder : Marthe Tourret qu’ei ua joena vriolonaira deu Massiu Centrau. Elisa, multi-instrumentista, que sòrt de’s formar dab Xavièr Vidal au DEM(1) de Tolosa. Au cors d’un encontre d’estudiants en musicas tradicionaus a Lemòtges, las duas joenas hemblas que s’i hèn a musiquejar amassa, en tot preparar un programa cortet de bal entà la restitucion de la jornada : que’s causishen ua melodia deus Apalaches, un tròç
cadien(2) e ua borrèia nòrd-occitana. Atau qu’aubiran ja çò qui vaderà quauques mes mei tard, un còp Marthe installada a Tolosa, lo duò Bourrasque : Elisa aus pifres e au banjo, Marthe au vriolon e aus pès, e totas duas a la canta.

Tau repertòri deu disc, que seleccionan ua seguida de borrèias deu Sejaleir (Auvèrnhe), mantuns aires deu Cantal, de Corresa, o enqüèra ua marcha de nòça de Bretanha baisha. Que’s hèn mei ençà en préner un tradicionau cadien, o en adobar ua polkà de l’Artensa a la mòda old-time nòrd- americana, dab Sail away Ladies de las Apalaches en dusau partida, melodia cuelhuda peu site slippery-hill.com. E òc, l’internet que desvolopa l’accès au patrimòni orau, e qu’aida a’n har lo ben de tots. Preu disc, que s’i audeish a un pifre d’ebèn, au jòc incisiu inspirat de la cabreta. Puish que passam au pifre de canavèra, au son mei boesat, dab un jòc colat pròche deu vriolon de l’Artensa. Las Bourrasque qu’assuman un discors musicau vertadèr, ancorat, tot en nuança e finessa, susprenent de simplicitat e de sinceritat. E que soa, aquò solide.

Aqueth disc qu’ei lo parat de collaboracions, permèr dab François Dumeaux qui a enregistrat e pòst-produsit lo disc. Entà Pa’Janvier, tradicionau cadien, Bourrasque qu’envita a Noëllie Nioulou (Poufs à Cordes, Aronde). Que liuran ua version instrumentau d’aquera canta, au vriolon, banjo e vrioloncèla. En partint de la version de Leyla McCalla & Cedric Watson(3), los glissandis melancolics de Loïsiana que hèn plaça a ua masurca a l’occitana mei enairejada. Entau tròç cantat Quand lo mèstre ven del mercat, las pistas sonòras apieladas que plean l’espaci e balhan un espessor qui hica en valor la beutat de la melodia. Preus dialògues de còrdas, de timbres e de repertòris, que pausan las basas de relacions musicaus neuridoras e inspiratoras.

1 – Diplòm d’Estudis Musicaus
2 – Cadien o cajun, designa la populacion canadiana-francofòna de Loïsiana
3 – Ligam youtube : youtu.be/Tzjxs9FC1ZI

Patwa

Bourrasque

Elisa Trebouville
Banjo, pifres, cant

Marthe Tourret
Vriulon, pès, cant

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !