Anar dens l’espaci
Donc voletz explorar l’espaci ? Au delà de la linha de Karman ? Vos brembatz ? Qu’ei la frontèra enter l’atmosfèra terrèstra e l’espaci, a 100 km d’altitud. Mei enlà, un avion ne pòt pas mei volar sense partir en orbita. Que voletz hèr exactament ?
Viatjar dens l’espaci, mes qu’ei sonque tà la recèrca scientifica, non ?
Dinc a uei, òc. Per exemple, l’estacion artificiau International Space Station qu’ei un gran laboratòri tà la telemedecina, la biologia, la recèrca sus materiaus, etc. Mes que i a tanben torisme espaciau. Sonque catorze personas que n’an hèit. Dab 20 milions de dollars per persona ! Totun las enterpresas que’s multiplican : Space Adventures, Virgin Galactic, SpaceX…
Quan comencèn de viatjar ?
En 1957 l’Union Sovietica que lancèc lo prumèr satellit artificiau, Spoutnik 1. Desempuish, qu’avem lançat mei de 6000 satellits enter los quaus ei lo francés Asterix en 1965. Lo prumèr viatjaire que s’aperava Iurii Gagarin (1961), seguit per Valentina Terechkova (1963). Puish l’american Neil Armstrong que botèc lo pè sus la luna en 1969.
Ei de bon víver dens l’espaci ?
Lo problèma qu’ei l’apesantor. La sang ne circula pas plan, la cara qu’en·hla. Avetz vist la cara de Thomas Pesquet acerà ? L’esquelèt ne pòrta pas mei lo pes deu còrs : au cap de sheis mes l’astronauta qu’a perdut lo 20 % de sa massa ossosa e mei enqüèra de massa musculara. Que’u cau emplegar un ventilator quan drom, se non que pòt morir asfixiat peu CO2 qui’u demora sus la cara.
De tota faiçon n’ei pas tà nosautes.
Perqué ? Coneishetz New Space ? Que son 1 000 entreprenedors dont Google e Amazon qui vòlen conquerir l’espaci. En 2015, Barack Obama, president deus USA, que promulguèc ua lei dita Space Act. Que permet a las companhias americanas de s’apropriar las ressorsas de l’espaci. Ua vertadèra colonizacion coma la deus conquistadors. Daubuns qu’an dejà signat contractes tà espleitar los mineraus contenguts suus asteroïdes.
A jo que m’agradaré de víver sus un aute planeta.
Qu’as rason, la Tèrra qu’ei tròp petita. D’alhors, Elon Musk que vòu crear ua vila autonòma sus Mars e enviar un milion de personas en 20 o 30 ans. Mes n’ei pas de bon hèr. Se cau tres jorns tà anar sus la Luna, que calerà sheis a ueit mes tà anar sus Mars. Qu’ei a 54,6 milions de km de la Tèrra.
Poirem víver acerà ?
Perqué non ! La gravitat sus Mars qu’ei lo 37 % de la de la Tèrra. Sus Mars, la temperatura mejana qu’ei de 60°C mes -125°C aus pòles. Musk que perpausa de hèr explosar bombas nuclearas sus las calòtas glaciaras. Lo CO2 liberat qu’aumentaré la quantitat de gas d’efèit de sarra e benlèu la temperatura e la pression. Atau, l’aiga que poiré demorar a l’estat liquide. Adara la nosta tecnologia n’ac permet pas. De mei, ne sabem pas se foncionaré. Que trobaram solucions. Que sabem dejà tirar l’oxigèn deu sòu de la Luna. Per ara, lo programa Artemis qu’enviarà umans sus la Luna en 2025. Que servirà de tèst tà las missions marcianas.
