Lo pan codonh
Es de codonh ensucrat còit dins la pasta de pan. Se tròba un pauc pertot en Occitània. D’unes lo fan amb de pomas o de peras.
Ingredients
4 codonhs
500 gr de farina
sucre
15 gr de levam
sal
Preparacion
Al mièg de la farina, sus la taula, metrem lo levam, un pecic de sal e un veire e mièg d’aiga tebesa. Barrejar e pastar fins aver una bòla que daissarem pausar dins un lòc tebés jos una toalha. D’aquel temps lavarem los codonhs, los pelarem, los vuejarem del còr amb un cotèl e emplenarem aquel trauc de sucre.
Al cap d’una ora e mièja, sus la taula enfarinada, espandirem la pasta amb lo bistortièr a mièg centimètre d’espés. Talharem quatre carrats de 20 cm de costat e n’estroparem los codonhs en pausant lo trauc ensús. Los tornarem cobrir e los daissarem dins un lòc tebés doas o tres oras. Puèi los enfornarem a 210° per mièja ora.
Variantas
Se pòt cambiar lo sucre per de mèl ; ajustar una gota d’aigardent ; far amb de pomas o de peras. A la Val Pèlis, amb lo sucre i meton un pauc de burre.
