Seleccionar una pagina

Tòca-Maneta

0 |

A TAULETA ! – Gastronomia e videojòc

Crèdit fòtos : 1– Overcooked / 2 – Final Fantasy XV-Barramundi au beurre / 3 – Zelda Breath of The Wild

Chapaires de maneta, picorejaires de botons, balhaires de jòia a papillas e esportius de taulejada, adissiatz !

Per un còp, vau pegar al tèma coma lo rabinat al fons de la padena, qu’anam parlar de manjar e de jogar… pas al meteis temps, banda de galafres despachatius !

E nos va caler far un pauc de tria, que de jòcs que parlan de chapa n’i a un fum ! A l’encòp, me diretz, de qué fan de personatges istorics coma Pac-Man o Kirby s’es pas engolar a pauc près tot çò que lor passa jol nas ? Eles, de tria, ne fan pas, sèm mai pròches de la bolimia que de la gastronomia fina…

Valdriá lo còp de parlar d’Overcooked (e sa seguida) per çò qu’es un jòc tras que bon. Ailàs, la cosina, que se limita lo mai sovent a de pizzas, de burgers o de sopas, i es pas qu’un pretèxte, principalament a se desavenir, de biais a pauc près definitiu, d’amb sa mitat o sos amics. S’agís mai de gestion que de mitonatge, de panica que de picanica.

Non, cresi que son los RPG, los jòcs de ròtle, que plan sovent desvolopan la cosina, lo repais, e aquò permet sovent de perpausar un temps per bufar dins una quista dessenadament epica. Ieu me soveni de RPG japoneses ont la cosina pren una plaça importanta : cal trobar de chefs amagats, que daissan una recèpta, de bon aprestar lo ser al canton del fuòc, amb tota la còla. Dins Tales of Symphonia e Tales of Vesperia, un plat preparat a una incidéncia sus las estatisticas dels personatges, e sa confeccion dona luòc a una cinematica suava, un relambi dins una istòria longassa e plena d’accion. Anatz rire mas i ai quitament descobèrt de plats, e n’i a tanben d’unes qu’ensagèri de far puèi ; s’i pòt cosinar de tant de caulets farcits que d’estècs Salisbury, de sopa misò o de bolhabaissa. Coneissètz la vichyssoise, una sopa de patanas que se manja freja ? E ben ieu, ara, òc. E vosautres tanben, perque vos o veni de dire, forçadament. Sovent, se tròba un jos-tèxte cultural dins aquestes jòcs que se las recèptas i venon d’un pauc pertot, los caps de cosina i son de caricaturas francesas : mostacha, accent, tòca, davantal… Aquò conta de causas sul rapòrt dels japoneses a França e sa cosina, en comparason de la lor…

Mai recentament, Final Fantasy XV perpausa, dins lo meteis registre, una tièra de plats de se far al campatge lo ser aprèp una rufa jornada a desquilhar de mostres. E onèstament lo nivèl de modelizacion d’aquesta mangiscla, o avèm pas jamai vist, vos prometi que n’aviái la talent (e d’idèas) que montava ! Foguèt talament remarcat, e remarcable, que se’n serviguèron d’argument per vendre lo jòc.

Autre jòc japonés, Zelda Breath of The Wild, ont la descobèrta e la curiositat fa talament partida de l’aventura que sufís de botar 2 o 3 causas culhidas o caçadas dins la caçòla per veire çò que dona. Serà pas totjorn quicòm de comestible, mas la tièra de çò manjadís es pasmens infernala !

E alara ? I a pas que dins çò que ven del Japon que la cosina ten una plaça tan importanta ? Evidentament non. Resistirai pas al plaser de vos parlar (encara) de Stardew Valley, pichon jòc de simulacion agricòla, que vos buta a far venir vòstra ortalissa per ne far de plats. Se pòdon quitament ofrir als vilatgeses d’a costat ! E, subran, mon rasonament s’avalís : Stardew Valley es plan inspirat de Harvest Moon, seria de jòcs… japonesa.

Ne tiraretz las conclusions que voldretz, e ne tornarem parlar al sopar.

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !