Una escasuda per l’edicion 2018 del Campestral
Organizat cada dos ans per l’associacion P.A.S.T.E.L (Patrimòni Agricòl, Sabers, Tecnicas En Lauragués), le Fogal rural, le Comitat de las Fèstas e la municipalitat d’Aurevila, le Campestral en Lauragués es una granda fèsta campèstra e occitana amb una dintrada liura e gratuita. Aquela manifestacion culturala, venguda una vertadièra institucion en Occitania, compta mantunes milièrs de visitaires. Le Campestral mobiliza e fedèra la populacion d’Aurevila, totas generacions e totas originas confondudas, a l’entorn d’un projècte original, revelant atal tot le dinamisme d’una pichòta comuna rurala a las pòrtas de Tolosa.
Sus la plaça del vilatge, èra pas aisit de s’aprochar de la scèna ont Nadau fasiá l’espectacle aqueste dissabte de ser. Dins le mes de mai, le grop aviá fach l’Olympia, a portanèls tampats, per festejar amb son public sos 40 ans en cançons. Le cònse, Xavièr Espic, que ten fòrça a la gratuitat de totas las animacions del Campestral s’adrecèt als espectators abans de daissar plaça a la musica. Amb traduccion instantanèa en lenga nòstra, grandmercegèt les benevòles e faguèt un apèl a la generositat de cadun per que la cultura occitana e la soa lenga contunhen de s’exprimir a travèrs aquela manifestacion unica que presenta le Campestral. Jan, le capmèstre del grop Nadau, grand defensor de las soas raiças pirenencas, perseguissiá son espectacle bilingüe amb umor, plen de tendresa, de poësia e d’impertinéncia. Le concèrt ont se mesclava guitarra electrica e boha foguèt un vertadièr moment de plaser per un public vengut nombrós e de còps de fòrça luènh !
Al programa del dissabte 22 de setembre e del dimenge 23 de setembre, i aviá de demonstracions de vièlhas mecanicas, de vièlhs mestièrs e una pichona bòrda dins le vilatge. E pel primièr còp dempuèi 3 ans, las «Randovales» èran a l’aficha ! Las darrièras « Randovales » organizadas en 2015 a Vièlha-Tolosa foguèron un plan grand recampament popular amb prèp de 3000 participants. Malastrosament, per d’imperatius economics, aquel eveniment foguèt suprimit en 2016 e 2017. Las « Randovales », l’eveniment esportiu natura incontornable del Sicoval, èran tornadas al Campestral les 22 e 23 de setembre de 2018 per una represa conviviala aprèp tres annadas de pausa. Caminaires, ciclistas, correires : tots èran presents per aquel grand eveniment. Les concurrents foguèron aculhits a partir de 7 oras per un desjunar e poguèron retirar lors dorsals abans le despart.
Le Campestral es tanben una fièra artisanala, de concorses de lauradas, concèrts, balètis tradicionals e teatre en lenga d’òc. I a tanben pels pichons de jòcs tradicionals, un bal de mainatges, una dictada e de passejadas en calèchas. Demest les vièlhs mestièrs artisanals, lo de Francis e Marisa Sansus : panheraires. Trabalhan le vim per far de panièrs mas tanben un fum d’autras causas coma de cabanas pels aucèls, de decoracions interioras e exterioras (un molin per exemple) e tanben d’engranièras (grandas per passar dins l’ostal mas tanben de pichonas per la chimenèia).
Sabèm pas encara se i aura una novèla edicion en 2020 mas le succès d’aquela darrièra edicion 2018 es mai que prometedor e les benevòles son plan motivats.
