Seleccionar una pagina

Issa !

0 |

Un bessonatge de carrièras ?

Despí quauqui annadas, viatgi en lo « Sud-Oest » embé Agen coma ponch central e Tolosa, la vesina, m’acuèlha regulierament.

Que sigue per li mieu vísitas a la Tuta d’Òc (la libraria occitana), a la redaccion dau Diari (e au sieu maravilhós cap-redactorNDLR : sentiretz benlèu per aquela operacion seduccion que nòstre contributor nissard èra a mand de rendre son article en retard...!) ò per l’anniversari dau CREO Tolosa (l’associacion dei professors d’occitan) a l’Ostal d’Occitània, li mieu pas mi menon soventi fes a la carrièra Malcosinat.

E lo premier còup qu’ai vist aquela adreça, ai pensat a una autra vila vielha : lo BabasokLo Babasok es la nomenalha dau vielh quartier de Nissa, ligat a la sieu ressemblança ai vilas arabi. Bab el Sok significa la pòrta dau mercat.. D’efect, a Nissa, avèm la carrièra Mascoïnat, que mena fins a la catedrala Santa Reparada, qu’aretrovam en l’expression “L’òr d’en Mascoïnat, qu ne’n vòu s’en fa”L’òr d’en Mascoïnat es tanben lo títolo de la pèça de JL Sauvaigo. Vees, meme quora si tracta de Tolosa, pòdi pas m’empedir de parlar de Sauvaigo. ò encara en lo nòstre imno :

Rue Malcousinat (Toulouse) - Plaque

Canti la capelina
La ròsa e lo lilà
Lo Pòrt e la MarinaQuartier de Nissa, en la vila vielha, pròch la mar dont si vendia lo peis.
Palhon,Lo nòstre flume nacional ! Mascoïnat !

Coma avii un pauc de temps sus lo camin dau retorn a Agen, ai fach una pichina tapa a Montalban e rescontrèri mai una carrièra Malcosinat !

La mieu curiositat èra tròup fòrta, un còp a maion sieu anat un pauc cercar. Per començar, ai trovat la famoa carrièra Maucodinat de Bordeu. Se diu famoa es perqué n’avii ja audit parlar embé li vísitas guidadi de l’Ostau Occitan. E lo sito de la ràdio França Blu dona tanben una carrièra a Granhaga, país a costat de Tolosa.

Ma coma mi pòdi pas arrestar ai confins occitans, ai provat d’anar un chícol mai luenh e es dau costat de la penísola ibèrica qu’ai trovat.

Pròch Madrid, avètz “el camino de Malacocina” e lu nòstres cosins catalans an lo “carrer Malcuinat”, carrièra qu’a finda ela la sieu pichina istòria estent que durant la dictatura, èra estada batejada d’un nom de general. Lo malcuinat seria estat un plat medieval, populari e bòn pati, “L’únic plat que té un carrer a Barcelona” coma di lo sieu còmpte Instagram.

Coma per toti li recercas en toponímia, cau destriar lo bòn e lo faus. Se l’origina de la marrida coïna e dei gargòtas reven soventi fes (lo nom latin malecoquinatum es meme donat coma origina de la carrièra nissarda), podèm lièger tanben lu ligams embe d’ancians proprietaris terrians. Ai alora contactat lo mieu amic e linguista Geli Van Heems.

“L’explicacion tradicionala es de faire calar Mascoïnat/Malcosinat/Maucodinat de “mau-coïnat”. Ma porria èstre tanben una remotivacion segondària d’un mòt mai ancian e qu’èra plus capit. Totun vist que d’autri vilas an la sieu carrièra malcosinat ò forma equivalenta, sembla dificil que sigue una coïncidença ò lo nom d’una familha.”

Doncas, s’avètz en lo vòstre canton, una via, una calle o una strada de la marrida coïna, contactatz la redaccion dau Diari qu’organizessiam lo premier bessonatge internacional de carrièras (s’ataquerem pi ai carrièras pairolièra/dels pairoliers) !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Geremìa Marçais

Geremìa Marçais es magistre bilingue à Nissa. Paire de tres enfants, jugaire de morra, de pilo e actor au teatre Nissart de Francis Gag, es finda un afogat de l'OGC Nissa.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.