Ua seria entà’us trobar tots… … e sus Amazon ligà’us

Ací qu’avetz un raconte deus dias ancians, lo que Diu Negre anè cuélher a l’Èst, per las tèrras escuranhosas de la tarribla zòna d’Ama. Ça-vietz a l’entorn deu larèr, uei, que s’i parlarà deus chebits deu començament deu monde de J. R. R. Tolkien, autor màger de la fantasy e l’adaptacion mei recenta de l’òbra soa : Lo sénher deus anèths : Los anèths de poder.

Au començament, qu’i èra Eru…. Amazon, perdon, e la soa volontat de har deu monde deu Sénher deus anèths ua navèra seria, un produit mei entà la soa platafòrma de vidèo a la demanda. Ua hami qui chepiquè beròi los ahuecats e los de Diu Negre purmèr. Adara qu’èm anats per las ombras mei escuras d’aqueth monde, ací qu’avetz las nostas tornas :

Seria de fantasy eroïca creada per J. D. Payne e Patrick McKay (Jungle Cruise, 2021), Lo sénher deus anèths : Los anèths de poder que compta ueit episòdis d’ua òra cadun (purmèra sason). Aquestes que segueishen las aventuras de mantun personatge qui viven los moments mei dramatics deu Dusau atge deu sorelh. En efèit, per aquera tempsada, qui’s debana tres mila ans abans las aventuras de Frodò, lo monde d’Arda que viven en patz relativa : lo Mau dab un gran M, per estar estat vençut au Purmèr Atge, n’ei pas luenh e que va partvirar las existéncias de Galadriel (Èlfa luminosa e tarribla au còp), de Míriel (Regenta de Numenòr), de Bronwyn (hemna deu sud) e d’Elanor Pèpelut (ua hobbit qui cèrca aventuras).

Aqueras eroïnas que trebucaràn mantun dangèr suus lors camins : espròvas de las tarriblas, plan segur, mes tanben aliats com Elendil, Elrond, Halbrand, Arondir o l’Estrangèr. Tots qu’ensajaràn de compréner los cambiaments aviats peu monde d’Arda e d’i susvíver. Mes entà s’i escàder, que calerà véncer lo servitor mei arsecós e escusèc deu Vala Morgoth, lo tròp coneishut Sauron.

Enter quèstas personaus, viatges tots dangèrs e combats ritmats, aquesta navèra adaptacion qu’ensaja tanben de’ns har passar questionaments suu monde modèrne noste. Per estar la foncion purmèra de la fantasy, lo biaish causit qu’ei sovent grossièr e tròp chic eficaç : l’inclusivitat, l’ecologisme e la predestinacion deus èstes, que hèn ua mesclanha de mau devèrser. Qu’ei de dòu har, a voler parlar de tot en tan chic de temps, que’n vaden inaudibles.

Totun, que s’ageish d’ua seria de fantasy de bon compréner, quan tots los ahuecats d’istòrias mei maturas n’i trobaràn pas gran causa de çò qui’us poderé contentar — que ns’estimam mei avertir de tira — qu’ei ua seria a espiar, pr’amor de la soa realizacion de las bonas e peu jòc de quauques actors, qui ei deus interessants. De mei, se v’agradan los eròis luminós e un Mau escuranhós, aquera òbra que’vs divertirà. Vertat, l’istòria contada n’ei pas susprenenta (s’avetz lejut los libes) e a còps los actes deus personatges que son de tròp bon devinar, mes Lo sénher deus anèths : Los anèths de poder que demora agradiu per un public qui volha entrar, a tot doç, en aqueth monde ric qui ei lo de J. R. R. Tolkien.