« Oc Futura » dos punts, dobrissètz la cultura
Es a se demandar cossí vuèi le teatre, que de mès en occitan, pòsca arribar a se fèr una plaça, tant menudeta siaga, demest les lésers e passatempses pletorics e envaïdors que coneguèm. Vaquí coma exemple l'aventura de la còla de teatre de l'IEO d'Arièja.
Finançat per la region Nòva Aquitània e portat per Oc Prod (productor d’Oc Tele), le portal OcFutura (de prononciar «a l’occitana») recampa d’actors mai que mai d’Aquitània mes tanbens le CIRDÒC, establiment interregional.
Pasmens, la visita es simpla e bèla: sus una sola pagina, desfilan les contenguts prepausats pels partenaris. A cadun, segon sos usatges preferits, de causir le tipe de document e le biais d’ac consultar que li conven melhor.
Pels curioses o neofits, es un biais de se familiarizar amb l’idèa qu’existisson mèdias occitans que pòden produsir contenguts de qualitat sus tematicas que despassan le camp de las problematicas occitanas.
Pels occitanosensibilizats, negats jos quantitats d’informacions ont se tròba tant de qué beure coma de qué minjar, es l’escasença de trobar documents que, si que non, i serián passats a costat.
Pels actors dels mèdias, pòt pas far de mal de trabalhar ensemble e sembla tirar tot le monde cap amont. Amai, d’actors istorics ne costejan de mai recents.
Malgrat qualques dificultats, notadament per tenir le ritme, le projècte, que la fasa experimentala n’es prevista per un an, recep ja retorns positius, notadament del costat dels ensenhaires.
Apuèi le roman nacional e las migracions, les partenaris son a trabalhar a l’entorn de l’aeronautica, de l’environament e de la politica.
