Tè Vé Òc contunha d’obrar !
La còla de Tè Vé Òc es totjorn a l’òbra per vos ofrir d’emissions sus la vida occitana dins un espandi ara mai larg. Lo sèti de l’associacion es a Nimes mas Amada Cròs cubrirà l’espaci Vauclusa e Droma, Lisa Gròs, de son costat, seguirà leis eveniments culturaus e economics dins lo ròdol de Carcassona e la còla dei quadraires s’es alargada. Es un plaser de veire son engatjament per exemple sus lo recampament d’imatges que venguèron enriquesir lo film « La Bovina », comandat per lo CIRDOC e que sortirà tre la dintrada. Un film documentari es un projècte ambiciós e pesuc, mas tant ric que totei fuguèrem afogats e eficaces. Jutjaretz de la resulta !
Avètz vist d’emissions rodadas en estiu dins d’espacis diferents e que meton en evidéncia lo desir de cadun de promòure nòstra lenga e nòstra cultura d’òc : Aurèlia Lassaca a Salinèlas (30) amb l’editor l’Aucèu libre, la revirada L’òme que plantava d’aubres presentada a l’Ostal Sirventés de Carcassona, la Calandreta d’Aurenja e l’Universitat Occitana d’Estiu de 2019 amb son socit de diversitat e de transmission. Puèi en octòbre un concèrt de Muriel Batbie Castell, Pont Sant Esperit e lo patrimòni naut aupenc. Lo trabalh nos manca pas e fasèm tot per recampar encara mai d’abonats a nòstra cadena Tè Vé Òc-You Tube.
