Seleccionar una pagina

3QA

0 |

Sébastien Péjou

Sébastien Péjou

Tres questions per un òme de mila activitats. Sébastien Péjou es jornalista pel GRAL (Gropament de las Ràdios Associativas de Lemosin), i bastís e presenta lo jornal. Faguèt tanben córrer la lenga e la cultura occitana sus la ràdio RCF pendent mai de dètz ans. En parallèl mena l’espleitacion familiala, fa lo paisan. Un pè a la campanha, un pè a la vila. Sébastien Péjou, que sembla mestrejar la corba del temps, fa tanben de teatre coma autor e actor.

Lo Diari Pack 2020

– 1 –

Jornalista e paisan, dus mestièrs de passion, cossí fasètz per conciliar aquelas doas activitats ?

Dos mestièrs de passion, quò es ben quò ! Paisan quò es ‘n’evidéncia, prendre la seguda familiala era inscrit en me, coma far per téner si tu me copas mas raiç ? D’un autre costat, lo jornalisme… ai totjorn beucòp parlat e pausat de questions, “avant de marchar” te diriá ma mair. Fau èsser organizat per tot far entre las 8 oras dau mandin e las 10 oras dau ser, mas ne compte pas ! Ai ‘na granda chança : èsser paiat per far çò que me platz ! Pense que ieu ai mestier de far plusiors chausas en mesma temps, ieu ne sei pas quauqu’un que pòt ‘nar trabalhar lo mandin, tornar a la maison, durmir e lo lendeman tornar far la mesma chausa. Lo diumenc far lo fen, o chamnhar de prat las vachas o petaçar un barratge e lo lendeman far l’entrevuda d’un ministre, d’un grand medecin o d’un pitit menestrau : mon plaser quò es de viure dins lo contraste crese ben. Aitau, ieu sei jornalista, paisan, comedian, adjunt au mera de ma comuna e d’autras pitas besunhas.

– 2 –

Sètz president e actor per la tropa de teatre Bat de l’Aile que la devisa es « far rire tot lo monde e n’engraunhar degun ». Nos en podètz dire mai ? Cossí integratz la lenga dins los vòstres espectacles ?

En 2006 nos aviam énvia de far dau teatre a nòstra testa, ‘laidonc coma daus camaradas nos am creat “Bat de l’Aile”. Escrivem nòstres textes, fasem la mesa en scena e juguem en Lemosin, Perigòrd e quauques còps dins lo Lòt. La prumiera peça es en francés, la segonda es bilingua francés/lemosin. Avem la chança de trabalhar emb dos tecnicians professionaus per la partida son e lumiera, podem maitot aver daus musicians e ‘n’artificier si los organisators vòlen. Ujan am pas pogut beucòp jugar en causa de la COVID, mas lo DVD dau darrier espectacle se vend bien e nos fasem de la pitas videos en francés e occitan per gardar un contacte emb nòstre public, videos a veire sus lo site internet e los raseus sociaus. Nos amusem e esperem far amusar lo monde, quò es nòstra devisa !

– 3 –

Cossí vesètz la situacion de l’occitan à Lemòtges ? La politica linguistica de la granda region cambièt quicòm ?

Ieu sei d’aquilhs que vesen lo gobelet meitat plen ! Per ieu la lenga torna préner de las colors. Quand quauqua res es rare, quò deven preciós. Nòstras lenga e cultura devenen preciosas. Ne manque pas ‘n’ocasion de parlar, mesma emb ma casqueta de jornalista, la pus-part de mons confrairs me disen “Adiu” per dire “Bonjour”, nonmàs quò quò es desjà signe que son sensibilizats a la causa… e pense que tot los locutors deurián far parier ! Mostrar sa diferéncia, quò es mostrar sa richessa, e nos som riches de nòstra cultura. Las accions de la granda region e de l’OPLO favorizen ‘na nuvela atirança per l’occitan, se fasiá temps. Dempuei quauquas annadas sente ‘na debuta de consciéncia politica per la lenga chas nòstres dirigents en Nuvela Aquitània, per lo moment quò es pas parier au niveu superior. Mas quò vai venir, ne’n sei segur !

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !