Aquò’s un polit libre de toponimia occitana, daissat per Pau Fabre (defuntat en genièr). L’autor a volgut e sabut escriure un libre seriós e de bon legir dins un lengatge simple, mas sas Passejadas demòran pasmens un libre sabent. E mai saberut, Pau Fabre se sap rire e se trufa de las explicacions tròp imaginativas e fantasiosas qu’òm tròba tot còp e corregís amb vigor las errors dels que se vòlon creire sabents. Lo seissantenat de cronicas son un viatge amorós per las sèrras, las combas e las vals, al briu de las aigas, en caminant per vilatges e vilas del País d’Òc.