Se pòt pas tot dire d’un tal personatge amb un sol libre. Cada contribucion pòrta pèira a la bastison d’una figura occitana importanta, d’un òme, privat o public, e d’una òbra sens equivalent. Testimoniatges de companhs de rota, analisis de sa literatura o de son accion, cada tèxte aquí recampat jos la coordinacion de Josiana Daunís-Martí e Eric Fraj ofrís un retrach pròpri, personal, subjectiu. Çaquelà, d’una pluma l’autra, es una persona, multipla cèrtas, que se dessenha : escrivan, militant, contaire, umorista, intellectual, transmeteire… Un omenatge coma una evidéncia, que tòrna a Robèrt Martí un pauc de tot çò que daissèt al monde, los que lo coneguèron, coma los autres.