Ò, Tolosa !
Cal dobrir un capitòli novèl d’aquesta cronica en la consacrant a la vila (perduda ?)
• Jos tèrra, s’ausís la lenga d’Òc. E a l’aire liure ?
• Una frasa : “Noirigat de Tolosa, me plai de manténer son lengatge bèl” escriguèt lo Pèire Godolin…
• L’Ostal d’Occitania se trapa travèrsa Malcosinat. Atal, sèm pas sus las rotas bèlas qu’enfonzan las pòrtas de l’avenir e, de mai, trigossam una marrida reputacion.
• Tuta d’Òc : Lo nom de la librariá occitana. Per legir en lenga nòstra, nos cal metre en ibernacion ? Quora tornarà la prima ?
• Pensi pas que Glaudi Sicre siá la reincarnacion d’Arnaut Bernat qu’el èra un fabulós trobador dins la mesura que cantava pas en francimand.
• Tolosa, vila maudita pels vegans, ont un còp èra los aujòls matavan los buòus.
• Quna consideracion pels artistas ! Per anar veire mòstras de tablèus, cal anar als Tuadors !
• A l’estadi dels Minimes, m’es arribat de veire jogaires de rugbi dobrir la saca dels carpans, mas jamai mametas a se castanhar.
• Fièrs d’èsser occitans : Los sostens del TFC sortisson fièrament la bandeiròla roja e jauna d’afirmacion identitària.
• Jorn de finala : Del temps que las finalas del campionat de XIII se jogavan a l’Estadium e que i aviá pas d’autopista, long de la rota, los Catalans arrestats èran a faire grasilhar quilomètres de salsissa !
• Dolor : Ma pus granda pena de joinessa aquel mes de mai de 68 quand, a l’Estadium, los Limosencs batèron Carcassona en finala.
• Patiment : Ai ! Tolosa e Provença, Besièrs e Carcassès, com vos vi e com vos vei…
• E los comtes Ramon ? E Montmorency lo duc ? Roges e negres, mos remembres son…
• Perqué Tolosa la nuèit ? Un sisclal que s’esperlonga… (Joan Bodon).
• Ciutat espanhòla : Tolosa, vila-refugi del sòmi escanat d’una Republica ; vila-refugi del sòmi arroïnat d’una Catalunya lliura.
• Vila d’Orient : Ai pas la plaça dins aquesta pagina per vos explicar coma l’Alèm Surre-Garcia considèra Tolosa coma una pòrta d’Orient !
• Se Garona aviá volgut… Mas perqué volguèt pas ?
• Florista : Pensar de passar crompar un ramelet per l’anniversari de la Clamença Isaura !
• Avions : Lo dimenge a Blanhac val plan lo dimenge a Orly !
• A la Ciutat de l’Espaci, t’avisas que las estelas son nombrosas al cèl e que nos podèm acontentar d’èsser beluguetas sus aquesta Tèrra.
• L’Esperit Sant davalèt sus Tolosa jos fòrma de mongetas. Dins la trilogia dels caçolets occitans, se Castèlnau d’Arri es lo Paire e Carcassona lo Filh, reven a Tolosa d’èsser l’Esperit Sant. Es pr’aquò que s’i met carn d’oelhas, mas cal pas (malediccion) qu’i rage ensús de sang de tomata !
• Un còp de vin : Pensatz que cal saupre jogar a la pelòta basca per beure un veire de Fronton ?
• Ciutat de las Violetas : Aquò deu èsser d’istòria anciana que jamai vegèri talas floretas long dels baloards periferics !
• La manca : A veire los taps de veituras, se pòt pensar que se trapa cap de tiratap cò dels quincalhièrs de la vila (se ne demòra !).
