Seleccionar una pagina

Supereròis

0 |

La Reina Blancha

La Còsta d’Azur, emb son solelh, son ciau blu e sa mar chauda, es reputada dins lo monde entièr. Los toristas son nombrós a ne’n profiechar mas pertant pauc de supereròis l-i son ‘nats. Vos vau contar l’istòria d’Emma Frost.

Quand reçauguei lo subject dau numero dau Diari que tenetz dins vòstras mans, me demandei de qual eròi podriá parlar. En cerchar dins la basa de donadas secreta dau SHIELDLa Strategic Homeland Intervention Enforcement Logistics Division es, coma sabetz, una agéncia secreta de rensenhament, d’intervencion e de contraterrorisme creada a la fin de la Segonda Guerra Mondiala e jos contròtle de l’ONU., trobei una eroïna que passet quauques jorns a Niça, quand era jòuna. S’agís d’Emma Frost, una mutanta qu’es actualament un membre important de l’equipa daus X-Men.

Los Frost son una familha de riches comerçants de Boston. Segonda de tres dròllas, Emma a egalament un frair ainat, Christian. Degun zo sap mas las tres filhas Frost son de las mutantas telepatas que lor capacitat se vai renforçar emb la pubertat. A la debuta de nòstra istòria, Emma frequenta la Snow Valley School for Girls.

Sos resultats escolars son correctes, pas mai, e es trigossada per las autras escolanas per çò de son estatut sociau. Comença de sentir sos poders frotjar en ela, çò que li balha de las migranas tan terriblas que ne’n fai daus malaises. Mas compren que los pòt utilizar per melhorar sos resultats.

Quò fonciona e un de sos professors, Ian Kendall, que ne’n es amorosa en secret, l’incita a s’orientar vers l’ensenhament. Mas coma Emma lo potona davant la proprietat familiala, son pair lo fai congediar e fai dau chantatge a sa filha per qu’abandone son idea d’ensenhar. Veiquí la situacion explosiva quand la familha vòla vers sa proprietat provençala per las vacanças.

L’episòdi 4 de queu raconte se passa entièrament a Niça entre la Permenada daus Anglés, la villa daus Frost e una discoteca. Serà l’enchaison d’un desbalatge collectiu de tos los pitits e mai beus secrets de familha : Christian es omosexuau, Winston, lo pair, a una liason coma Vivienne, una dròlla pas pus vielha qu’Adrienne, sa filha ainada, que, ela, pausa per daus magazines de mòda…

La seguda serà mins plasenta emb la chasuda dins la dròga dau frair, son embarrament dins un establiment psiquiatric, e la rompedura entre Emma e sa familha. Quela istòria fuguet escricha per Karl Bollers e dessenhada per Randy Green. Queu prumier raconte serà seguit de dos autres dins la mesma seria, totjorn de Karl Bollers, publiats entre 2003 e 2005 aus Estats Units.

Mas quò es pas la prumiera aparicion d’Emma Frost. Lo personatge fuguet creat fin 1979 per lo scenarista Chris Claremont e lo dessenhaire John Byrne per lo n°129 de la seria Uncanny X-Men. Emma Frost l-i apareis coma la Reina Blancha dau Club daus Damnats, un grop de mutants que projecta de dominar lo monde. Finirà per chamnhar de camp e júnher los X-Men.
Per ne’n descubrir mai sus Emma Frost, podetz legir dos recuelhs de racontes a l’entorn daus mutants : X-Men : les Origines e X-Men : Black pareguts chas Panini Comics. Dins quilhs recuelhs, chasque raconte presenta un personatge. Entau, faretz tanben coneissença emb Magneto, Mystic, Cyclops o Wolverine.

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Capitani Lemosin

Lo Capitani Lemosin es un supereròi plan de chas nautres, que viu 'captat dins un repaire secret, au mitan dau malhum de galariàs que s'espand jos la vila de Limòtges. Son subrepoder ? Tot saber sus sos cosins americans, conéisser los bons plans en comic-books, serias e filmes de supereròis e ne'n far profitar lo monde, entau, per la sola beutat dau geste.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...