La foncion mitica

Tot a una origina, una explicacion. Cada question, una responsa. Cossí ? Perqué ? La realitat amagada darrièr lo present Diari, aquela que nòstra istorieta editoriala vos va ensenhar, es que, amb ja un numèro sul fantastic, puèi un suls contes, nos es venguda l’enveja de tornar encara mai a la font, a un temps d’abans lo temps, quand las bèstias parlavan – aquò o sabèm – mas tanben las pèiras, los vents, puèi qualques esperits folets ara escantits. Una epòca que d’òmes podián levar de montanhas e de dieus elementaris comandar l’avenir del monde.

S’es una causa de voler parlar de mites d’aicí e de mitologias mondialas, n’es una autra de saber precisament dins quina direccion anar quand tocam a un fosc tan cosmic. Per aquò vos perpausam un numèro ric, complèt, qu’avèm volgut als quatre camins de l’antropologia, de la literatura, de la musica e de la cultura populara. Amb Maud Moureau, cercaira interessada per la preïstòria dels mites, seretz al fial de l’estat de la recèrca ; amb Olivier de Marliave, jornalista especializat en panteon pirenenc, al còr de son menimós trabalh de collècta ; amb Henri Maquet o Roques (Stille Volk) dins lor laboratòri, a refargar la matèria mitica per l’estransi musical. E mai !

E ara, qué son los mites devenguts ? Oblidam pas l’actualitat nimai tanpauc lo fait que nòstras mitologias umanas son d’una impermanéncia duradissa. An ja cambiat de forma, per correspondre al temps nòstre : legendas urbanas, supereròis, reescrituras… costejan de bòlas paisatgièras mai ancianas.

Nos i estancam un moment e i arrestam lo temps per un Diari que serà, i cresèm, un numèro mitic !