Seleccionar una pagina

TV

0 |

Rescontre : un festenau de sosten ai corts metratges vidèo occitans

RESCONTRE – Qu’es aquò ?

Lo festenau de vidèo amators Rescontre nasquèt en 2009 a Sant Gervasi (30) a l’iniciativa de Miquèu Gravier, sòci de l’associacion Raions d’Òc e tanben de Tè Vé Òc tre sa creacion en 2012. Èra organizat en partenariat amb TV Mistral, Tè Vé Òc e la comuna de St Gervasi. Aculhiguèt per un temps fòrt lo realizator e productor Jean Fléchet (L’orsalhèr, primièr long metratge en occitan).

Se debanèt sèt còps au fogau dau vilatge sus dos jorns, la primièra dimenjada de febrièr, e menèt cada annada mai d’espectators. I èran projectats de corts metratges vidèo de 15 mn maximum, en occitan (part màger) e francés, e rodats en Occitània granda tota.

L’amira de RESCONTRE

L’idèa deis organizators èra mai que mai de faire ausir la lenga occitana e de valorizar la creacion vidèo en occitan, en alargant la coneissença de la cultura d’Òc. Èra tanben la necessitat de faire prene consciéncia d’una intercompreneson entre lei diferents parlars. Coneissètz ben la remarca : « O ! Parlatz pas coma ieu ! Compreni pas ! » Aquí, amb lo sosten de l’imatge, la compreneson èra facilitada. La presa de consciéncia de nòstra riquesa èra vertadièira. Sovent d’espectators venguèron demandar, après la serada, onte se podiá, ara, aprene la lenga. Èra un temps de convivialitat agradiva e d’escambis entre lo public e leis realizators dei filmòts que presentavan seis òbras.

RESCONTRE de 2018 càmbia de luòc !

Es a la Mediatèca Simone Veil de Marguerittes (30320) tot pròche Nimes, que se tendrà lo 8en Festenau RESCONTRE, organizat ara per Tè Vé Òc en partenariat amb Raions d’Òc e TV Mistral. La mediatèca aculhirà un public nombrós, lo dissabte 10 de febrièr, a 13 oras 45 e lei films seràn projetats juscas a 18 oras amb un entracte de 15 mn. La comuna de Marguerittes que reçaupèt fòrça favorablament nòstra demanda, ofrirà un aperitiu après lei projeccions.

Au programa, pas encara clavat (e sota resèrva d’apondon o cambiament) :

Shens papèrs (Philippe Espinasse e Eva Cassagnet. Art’Oc) ; La louange du cyprès (CREDDO) ; Abelhas negras (Ass L’arbre aux abeilles) ; Pèira romana : Nimes (Amy Cros) ; La vinha (P Laurent) ; La Diada a Barcelona 2017 (Miquèu Gravier), Dynamogène (Marc Carteyrade); Reinié Raybaud, poèta vinhairon (Philippe Reig de TV Mistral) ; Anglas, una torre, una civilizacion (Olivier Callerizza) ; Au pays des ânes heureux (Alain Boyer); A la vòta d’Aigas Mòrtas (Lisa Gròs) ; E la Romèca sortiguèt de son potz e Estivada sul Losera per D Lemaître. Ne podètz encara mandar d’autrei ! Veire site http://teveoc.com

SORTIR DAU BOCAL !

Organizar un festenau occitan de corts metratges es una bona iniciativa, e fasèm tanben « de pichòts » aquest’an, que siam demandats per n’animar d’autrei, coma a Gajan (30) lo 18 /11. Mas nos sembla que seriá necite de « sortir dau bocal », de pas demorar entre occitanistas e de veire programats de filmòts occitans dins lei festenaus nombroses sostenguts per la Region Occitània. Aimariam d’i veire programats de corts metratges occitans, dau mème nivèu que leis estrangièrs qu’i vesèm.

Rendètz-vos a Marguerittes lo 10 de febrièr de 2018 brave monde !

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !