Aquestes darrèrs temps, qu’avètz shens nat dobte vist a passar fòtos de collegians e liceans en plen tornatge suus nostes hialats sociaus. Que ve’n seratz dobtats, ua navèra emission qu’ei vaduda.

Dens l’encastre deu Contracte d’Objectius e de Mejans acordat per la Region Navèra-Aquitània, ÒCtele e las equipas pedagogicas locaus que balhan lo mot aus joens, qui participan d’arenlà directament a la produccion de la lor pròpia emission, au còr d’un projècte pedagogic apitat dab gran reflexion e paciéncia, e sustot dab ua passion sincèra.

Aqueths joens argonautas que se’n van alavetz, en companhia deus lors professors, de la presentadora Eva e de la còla d’ÒCtele, a la descobèrta de lòcs e personatges de noste qui ne coneishen pas : castèths, musèu d’art contemporanèu, recicleria, mercat, friperia, etc. ; que se’n passan causas de Lemosin dinc a las Pireneas. Enter las vesitas, enquèstas, e caças au tesaur, ne son pas las activitats qui’us mancan. Los eslhèves qu’entervistan a monde deu parçan de mestièrs, competéncias, sabers e perhius hòrt variats, e tot aquerò en bèth assistint l’equipa d’ÒCtele a rodar mercés aus lors microfònes e a las lors petitas camèras qui hèn seguir de pertot.

Mei qu’ua salhida escolara, aqueste projècte qu’ei tad eths lo parat d’immergí’s pregondament en la lenga e la cultura nostas, e tanben en lo mitan professionau de l’audiovisuau.

Que podetz dejà arretrobar lo purmèr episòdi de l’emission mensuau Descobr’aquí sus octele.com e començà-i l’aventura dab los collegians de Laruntz !