Seleccionar una pagina

Umor

0 |

VIVA 20-VIN !

I a de monde, pauròts, que son pas en manca de falsas idèas. Volián interdire de beure vin en genièr (e de mai en aquesta annada 20-vin !). Es benlèu aisit de proposar aquò als angleses, mas aicí en país occitan, l’idèa passa pas !

Vos vesiatz manjar talhons de còca de Rei en beguent chuc de poma ? Me diretz : perqué pas ? unas associacions – vergonha ! – de nòstras contradas son passadas a aquesta practica. Cossí beure un còp a l’annada novèla sens levar lo veire de blanqueta e gaitar montar a la susfàcia las pichonas baudufas, anóncias dels bons moments a venir ?

Aqueles malsapioses devon pas saupre que lo sant patron dels vin-hairons se festeja lo 22 de genièr. Vos vòli parlar de Sant Vincenç. Auriam agut bona mina de festejar lo mèstre de las vendémias e de las cavas en
trincant nòstres gòts d’aiga minerala !!!

Bon, los francimands t’explicaràn que lo sant es vengut patron dels vinhairons per çò que : Vincent : vin-sang !

E aquí, un còp de mai, la lenga francesa demòstra qu’es pas tant universala qu’aquò per çò que lor jòc de mots que val pas solament cinc sòus fonciona pas en lenga occitana. E que sabèm plan perqué la sang raja roja dins nòstras venas !

M’agrada mai de quichar (coma amb lo quichador per faire dintrar los ferrats de rasims en mirgalhadura dins las semals !) sus l’associacion sillabica mai portaira de vejaire positiu entre lo vin e lo sens. Lo vin que nos balha lo sens de la vida, que nos indica lo camin de la cava, que nos fa davalar e, probablament, remontar de la cava, lo vin que nos fa parlar (e, arribar d’unes còps, a las raras del desparlar !) ; lo vin a la confluéncia dels cinc sens : gaitar la color ; flairar sas redoléncias ; escotar lo glo-glo del liquid que raja de cantina en veire ; tocar amb precaucion, atencion (o adoracion) la cantina e lo veire ; lo metre en boca ; se congostar de l’ausir davalar dins nòstre fafièr. Òc, lo vin es una de las rasons que fan que tenèm cinc sens. E pensatz que se pòt cambiar nòstres païsatges en arrancant l’un puèi l’autre totes los arbres de la camba tòrta que pòrtan rasims de carinhana, granacha, sirà, sauvinhon, vionhièr, terret… ? Pensatz que las vinhas poirián atal desaparéisser luènh de nòstres uèlhs ?

Francament, quala o qual pòt pensar que l’Èstre Suprème va convocar Sant Vincenç e Sant Emilion dabans un tribunal d’excepcion per los fòrabandir del paradís e del castèl tot nòu del Papa – son representant sus Tèrra – per los mandar en Infèrn del costat d’Aigas Vivas ?

A còps de descaucèls, podèm ensajar de butar encara mai luènh nòstra soscadissa e nòstra oposicion determinada al projècte d’interdiccion. Lo vin es compausat de 85 a 90 del cent… d’aiga ! Per anar al cap de la logica, cal doncas interdire tanben aqueste element fondamental sens qué lo vin seriá pas de vin. E aquò seriá un trabalh bèl… Ba gausi pas imaginar : anem, vai ! Torna faire passar la cantina apr’aicí !

Granacha-Tastavin Roch

A prepaus de l'autor

Alan Roch

Alan Roch foguèt institutor pendent plan de temps, avant de venir animator cultural, çò qu'explica perque consacrèt una part de son activitat a escriure pels dròlles. E a contar, qu'Alan Roch es conegut per sas istòrias inspiradas de la tradicion e de la vida del seu país (Carcassona), que salpica d'un umor ironic. Son agach agusat li val d'escriure de cronicas dins mai d'una revista o jornal, e notadament sul rugbi, que n'es un afogat de primièra borra.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !