Santat !

Sembla que l’annada siá pas tròp marrida. Non, pel vin vòli dire, que pel demai… L’estiu s’acaba, coma la madurason dels gruns sucrats, la semal es per sortir, serà lèu emplenada.

Pertot dins nòstres paises sembla que la liana fruchosa aguèsse trapat, un moment o l’autre, un arbrilhon, un bocin de tèrra peiregosa per s’entortovilhar. Aval desapareguèt, en causa benlèu de la filloxèra que ne butiguèt tant e mai a partir cap a las Americas (clinhada apiejada a un Diari passat). Alai venguèt una industria, un business mondial sens chuc ni muc. Aicí, d’istòrias de cooperacions, de solidaritats, de mans tendudas e noseludas coma los ceps. De revòltas tanben, quand lo roge rajava de barricas en barricadas.

Se causiguèrem de nos interessar al vin es qu’es un vertadièr ben cultural qu’embeu son terrador, los òmes e las femnas qu’i vivon. E cadun, bandòrra o beu-l’aiga, pòt contar la sieuna ! Dins aquel Diari, plen a ras de novèl·a·s contributor·a·s – mercejat·da·s sián de rejónher l’alcoòl la còla – s’agirà un pauc d’aquò : a cadun son raconte, son biais, son parçan, son vinhal, son gost mai sa lenga. E, aital, de botelha en cantina e de gòt en veirat, vistalham lo país sens jamai s’èsser levat·da de taula.
Bona tasta d’aquel Diari millesimat – dos mila vin – e de sason, madurat en bota de roire e en partenariat amb Moderacion, de consumir sens !

Es benlèu encara temps per nòstra ofèrta de dintrada : se vos abonatz a comptar d’aquel Diari recebretz en present Lo Diari n°56 de l’estiu sus “America del Sud” !

Ofèrta fins al 16/09/2020