Glaudi Barsotti fa reviure a travèrs de tèxtes d’autors, uei pauc o pas conoissuts, un periòde tragic que lo pòble marselhés visquèt dau temps de la Comuna.

Lei tèxtes presentats, cançons e tèxtes en pròsa, testimonian deis eveniments que se debanèron entre 1869 (eleccions legislativas) e 1875 (darriers procès dei comunards). Pasmens estent lo drama prefond que marquèt leis èimes, son totjorn presents leis eveniments en 1893, lo sòrt dau paure Sant Trofima o puslèu de son estatua, n’es una illustracion.