Lo Petit Thalamus es un testimoniatge excepcional : s’agís de la version mai complèta de la mai anciana cronica urbana dins una lenga populara de l’Euròpa medievala, aquí l’occitan. L’interès de sortir aqueles escriches dels Archius municipals de Montpelhièr ont son conservats es doncas lingüistic, mas tanben istoric, amb gaireben 200 ans percorreguts per la narracion de las costumas, fèstas, guèrras, epidèmias d’una ciutat obèrta sus Mediterranèa. Lo projècte d’edicion es bèl, amassèt d’istorians, de lingüistas, de cercaires e foguèt ja premiat per sa tòca monumentala.