Seleccionar una pagina

Dorsièr

0 |

Marselha – Tolosa O la pesca au Lamparo

MARSELHA
TOLOSA

Totem Sismic

Polifonic System
Label Buda, 2019
Produccion Lamparo
14.99€

Còp de hialat sus la cultura occitana a Marselha ! Lo site web occitanie-musique.com que’vs miarà de cap tà la companhia deu Lamparo, fondada preu cantaire Manu Théron a l’entorn deus projèctes musicaus sons. Lo Còr de la Plana, Sirventés, Chin Na Na Poun… Fòrt d’òmis, e’m diseratz ?! La Madalena que vien contrabalançar lo tot, en envitar vint-e-tres cantairas occitanas tà ua medisha pregària. De bon notar tanben, la collaboracion Lo Còr de la Plana – Assurd, per la creacion Vé Zou Via. En colissas, que son hemblas a la regia, a la comunicacion, a l’administracion. E las nautats qui ns’interessan ? Lo navèth projècte deu Sam Karpienia – De la Crau – e lo Totem Sismic de Polifonic System !

Que son 4 cantaires musicians : Ange B, beat-boxaire e fabulous trobador tolosan, ancian binòmi deu Claudi Sicre, Henri Maquet, flabutaire cosmic, Clément Gauthier, cantaire e chabretaire membre deu collectiu La Nòvia, e Manu Théron, polifonicaire famós. Dab l’album Totem Sismic, lo quatuor Polifonic System que s’alinda un anar musicau vintage, kitsch, fresc e fluò !

Quin qualifiar mei la musica aquesta ? Estossi un accessòri a portar tot dia, que seré ua banana de las annadas 90. Non pas la segalina, l’auta, la sacòla de malh. La qui torna de mòda uei lo jorn. Pr’amor de l’epòca, deu look, de l’estile, solide, e tanben pr’amor deu movement culejant indusit preus ritmes e sonoritats deu sound system. Quiòc, qu’an gausat har deu sigle RSA un arrepic corau, en la cançon « Polkamploa ». Las paraulas de las cantas tradicionaus que son reescriutas, tàd arríder, tà descríber ironicament los nostes contèxtes sociaus, tà seguir lo briu de la tradicion qui vòu los cantaires e s’adoben las paraulas au besonh e a l’enveja. Tà perseguir lo ligam artistic hòrt enter Marselha e Tolosa, iniciat de las annadas 80 enlà, la cançon « Quan ieu me’n vau » que cita lo quartièr Naut Bernat, cantat e arrecantat preus Fabulous Trobadors. La plaça de las Terceretas, lo restaurant la Kasbah on son servits « lo tagine e lo vin per acompanhar »… Lo tròç qu’accelèra, las votz que’s responen, convocant l’imaginari sonòr deus país magrebins delà la Mediterranea. Qu’èm en la tradicion de las cançons de taula, qui incita lo patron de l’establiment a regalar los clients cantaires. Lo lamparò polifonic qu’arrecapta totas las influéncias e experiéncias deus nostes quate occitans.

A comptar de 1996, lo grop qui marca lo paisatge cantat occitan costat provençau qu’ei lo triò puish duò Gacha Empega. Au sortir d’aquera collaboracion dab Manu Théron, lo Sam Karpienia que vad fondator carismatic de Dupain enter 1999 e 2016. Puish qu’avia un encontre musicau maridant cants occitans provençaus e repertòri d’Anatolia : Forabandit. Uei, qu’arretròba a Manu Reymond a la contrabaisha, au Thomas Lippens aus tamborins e percussions divèrsas, tà perpausar lo triò acostic de transa poetica post-ròck De La Crau. Lo cant, tostemps centrau, que supòrta la lenga occitana activista per esséncia, creativa per colèra.

 A Marselha, la pesca musicau b’ei bona. Lo peish que viroleja, las votz que retrenishen, la lenga nosta que graseish d’escrins creatius deus bèths.

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Laissar un comentari

Mercés de vos connectar per comentar
  Soscriure  
M'assabentar quand

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !