Seleccionar una pagina

3QA

0 |

Manchø

Manchø

Dracon, Lo filh del Drac es una benda dessenhada originala e risolièra pensada e estampada en occitan. Aquò’s pro rare per o soslinhar. Lo Drac es un personatge conegut de la mitologia occitana, aquel qu’es mens conegut es son filh, « mandat sus Tèrra per semenar la terror ! ». Problèma : lo Dracon fa pas paur, ensaja a tota fòrça d’espaurugar una drolleta, que malgrat sos esfòrces lo tròba mai que mai manhaguet. Dracon ne patís bravament e lo paire li brandís quitament las pelhas : « Tot lo monde se trufa de tu en infèrn ! » E, sus tèrra, nos crebam la pèl de rire.
Aquela BD es fargada a la mena de Garfield o Mafalda, son de « strips » cortets, que se pòdon legir solets o de contunh. L’autor se ditz Manchø, es tanben musician (Monsieur Plume) e professor d’arts plasticas. Florent Vergnes, de son nom vertadièr, respondèt a las nòstras 3 questions.

– 1 –

Qui es Manchø ?
Nos podètz presentar lo vòstre CV de dessenhaire ?

Manchø es lo pseudonim qu’ai pres per far de dessenhs. Ai fach d’estudis en arts plasticas e tanben en occitan a l’universitat de Montpelhièr. Puèi ai passat lo concors de professor e ensenhi ara las arts plasticas en Corresa. En parallèl, soi donc dessinator dins mantun jornal coma Le Bulletin d’Espalion, Le nouveau Montpellier, La Trousse Corrézienne o encara lo site occitan Jornalet.

Aquest’an ai publicat un Best Of de mos dessenhs en lenga francesa : Best Of Dessins D’humour. En lenga occitana, ai fach doas publications l’an passat : La tartuga de la garriga, qu’es un kamishibai e Dracon, lo filh del Drac qu’es una BD.

– 2 –

Perqué sortir una BD en occitan ? D’ont sabètz la lenga ? Quina plaça ten l’occitan dins las vòstra activitat de dessinator e dins la vòstra vida vidanta ?

Lo punt de partença es un constat :
i a pas gaire de BD occitanas, qualques traduccions d’Asterix o Tintin mas pas fòrça BD originalas, pensadas en occitan. Aviái enveja de contribuir a comolar aquesta manca. E la BD èra una enveja mieuna dempuèi totjorn.

La lenga occitana, la parli dempuèi lo collègi. Tot lo mond dins ma familha la parla donc èra natural per ieu de l’aprene. E Bodon e son Drac foguèt un dels primièrs autors que veguèrem en classa…

– 3 –

Nos podètz presentar Dracon e la drolleta, los personatges principals de l’istòria ? Perqué un Drac ? Avètz paur del Drac ?

Primièrament soi avaironés donc l’òbra de Bodon me tòca forçadament. E aquesta figura del Drac (e dels dracons) m’a totjorn fascinat. Per ieu, lo Drac es un personatge fòrt del folclòr occitan, vertadièrament espaurugant.

Ai donc pensat que seriá comic de virar tot aquò en derision, de prene lo contrapè amb Dracon, lo filh inofensiu del Drac, qu’arriba pas jamai a far paur a degun, nimai a la drolleta qu’es aquí per representar los dròlles en general, que son puslèu paurucs per natura.

Fin finala, la drolleta es lo clown blanc e Dracon l’Auguste.

Dracon, Lo filh del Drac

Manchø
Edite-moi !, 2019 – Occitan
23 x 17.2 cm
44 paginas
12 €
ISBN 979-10-92382-53-2

Ne'n saber mai

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !