Seleccionar una pagina

Hats e dats

0 |

Los jòcs de ròtle, del papièr al numeric

Los jòcs de ròtle (JDR) son d’uèi plan ancorats dins nòstras societats, mas qu’es aquò qu’aquela bèstia ? Es malaisit de balhar una definicion que va per totes tan lo genre evoluiguèt, ça que la es possible de donar un concèpte comun. L’idèa d’un JDR es de menar de jogaires a incarnar un personatge dins l’encastre d’una aventura definida per avança.

Los primièrs JDR amassèron de « jogaires » e un « mèstre del jòc » (MJ) en carga de menar l’aventura e los jogaires. Se fasiá amb de gredons, de fuèlhas de personatges que contenon totas las competéncias e las caracteristicas dels jogaires (agilitat, fòrça…), de dats e un libret de règlas per ajudar lo MJ que conten mantuna informacion (l’istòria, los equipaments…). Lo MJ conta l’aventura als jogaires e lor pausa de problèmas al fial del raconte, per exemple : « Sètz davant tres camins, ont anatz ? ». Los jogaires devon en foncion de lor volontat e de lors capacitats prepausar de responsas e d’accions al MJ. Los dats permeton de simular l’aleatòri e doncas la capitada o la malescaduda. Fin finala es un pauc un conte interactiu que los jogaires ne son actors e ont lo narrator se deu adaptar de contunh. Consideram lo primièr JDR amb la seria Dungeons & Dragons (D&D) fondat en 1974, que se basa sus un univèrs medieval-fantastic inspirat de Tolkien. Pr’aquò, la tematicas son lèu diversificadas e avèm per exemple de JDR de S-F, policièrs, d’orror… Es a dire mai o mens totes los genres de la literatura. Mas lo problèma dels JDR de « taula » es que necessitan fòrça temps, un pauc de plaça e d’èsser mai d’un. Es en causa d’aquò que dins las annadas seguentas, lo genre dels libres-jòcs pren una aviada considerabla. Dins lo principi, es pauc o pro la meteissa causa que pels JDR de « taula », mas sèm aquí dins un libre. Tota l’aventura es trocejada en pichons paragrafes numerotats a l’azard. Lo lector-jogaire deu doncas navigar de paragrafe en paragrafe en foncion de sas decisions. Es un biais mai practic, mai rapid e individual d’accedir als JDR.

Evidentament, amb los progrèsses de la tecnologia e los jòcs vidèo, los JDR foguèron portats. A la debuta, èran mai d’aventuras textualas sus micro-ordenadors del biais dels libres-jòcs, mas se diversifiquèron lèu, coma pels Final Fantasy, de JRPG (JDR japoneses) que mesclan combats en torn per torn e descobèrta d’una mapa. Lo cambiament màger ven de las annadas 2000 e de l’aparicion de l’Internet amb doas licéncias, World of Warcraft (WoW) e The Elder Scrolls (TES). TES va incarnar las nocion « d’open world » (monde dubèrt), que lo jogaire es liure d’anar ont vòl e de far çò que vòl sens constrencha, lo MJ e los autres jogaires son remplaçats per una IA (Intelligéncia Artificiala). WoW, el, va popularizar lo genre del MMORPG (JDR massisament multijogaire) de mercé l’Internet. Es coma TES, mas aquí los jogaires son vertadièrs e tot lo monde parteja la meteissa mapa.

Fin finala, lo JDR a caminat per seguir los progresses de las tecnologias e las envejas de la societat e sèm a un punt que de quites jòcs de platèu coma lo UNO, Destin e d’autres son a passar en version numerica, tan vectors coma indicators de nòstra digitalizacion. Mas los JDR « fisics » son pas mòrts e per exemple D&D sortís aqueste estiu d’autres libres d’aventuras del temps qu’en França, Gallimard torna publicar sos successes de libres-jòcs. Segur qu’es sonque una tendéncia globala e que cadun deu causir en foncion de çò que li agrada.

Per acabar, aimariái d’abordar un punt sensible, las « addicions » als JDR, perque quand parlam JDR, las gents s’imaginan sovent un « geek ». Mas los JDR recampan d’amics, fan trabalhar l’imaginacion e nos permeton de viatjar dins d’autres mondes. Amb lo confinhament, prenguèrem consciéncia qu’un contacte virtual ne demòra pas mens un contacte. Aital las problematicas soslevadas per d’unes son pas forçadament ligadas als JDR en se, mas a l’usatge que n’es fach !

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Ancelin Cousin-Fauré

Adieu ! Soi un jove estudiant de lenga nòstra a l’universitat Joan Jaurés. Mon rapòrt a l'occitan sembla un pauc a una bona galejada perque soi un francimand (normand) que vòl devenir professor de lenga nòstra. Soi apassionat de jòcs vidèo tan dins lor pratica coma dins la cultura o la creacion a l’entorn. De mai aimi tanben los jòcs de ròtle e la sciéncia-ficcion distopica.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...