Seleccionar una pagina

Estudiant

0 |

Lo Drac

Avís de recèrca : claus de color ròsa / Recompensa : tota ma gratitud

Tròbi pas pus ma clau per dintrar dins mon ostal… Mon papeta m’a dich qu’es lo drac… mas de qu’es lo drac ? Ai pas jamai ausit parlar del drac, doncas ai demandat a mon papeta de me contar l’istòria del drac, vaquí son discors :

”Mon dròlle, es normal que conescas pas la legenda del drac, siás jove e aquela istòria es vièlha coma ieu puèi qu’aquel mot ven del latin draco/draconis. Mèfi, s’un jorn veses lo drac es un jogaire qu’a per jòc favorit de se trufar dels òmes en raubant las causas (coma per exemple ta clau) o en metent lo rambalh pertot. Demòra atentiu puèi que per enganar los òmes lo drac a la facultat de se transformar en òme per sedusir los dròlles o las femnas per çò que lo drac es coma Don Juan : un seductor. A un detalh prèp que chapa los dròlles e las cortesanas o qu’utiliza aquestas coma noiriças. Lo drac es un èsser sornarut. Utiliza d’autras tecnicas per arribar a sas fins coma l’orguèlh e l’avarícia dels òmes. Per exemple, per atirar los òmes cap a el, lo drac a la facultat de far aparéisser jols uèlhs dels òmes de riquesas que cobejan. Ieu, ai pas jamai vist lo drac. Mas Maurici, un amic auvernhat a vist lo drat (es son nom en Auvèrnha). E m’a fach tot un discors sus sa forma fisica. Ai retengut qu’aquel foleton de drac es pas una creatura amb una forma vertadièrament definida puèi que segon las legendas pòt èsser a l’encòp una cabra, una sèrp, un ase, un caval o encara un lop. Mas lo drac pòt tanben èsser totes los animals a l’encòp puèi que pòt èsser compausat de diferentas partidas d’animals coma una crinièra de leon, un pitre de lop o encara una aleta de peis puèi que son luòc de vida es l’aiga e per melhor dire las prigondors de l’aiga. Lo drac a un ligam important amb l’aiga puèi que i a de flumes e de rius dins los Alps franceses e italians qu’an un nom derivat del drac coma Drac, Doire o Durance. Las personas d’ara van dire que lo drac es una legenda inventada per la populacion per explicar totes los dangièrs de l’aiga. Mas la vertat es que lo drac es un farfadet fòrça perilhós puèi qu’es lo filh del diable e es doncas en ligam amb l’Infèrn. Los vikings son un pòble fòrt e perilhós que vòl far paur a tot lo mond. Utilizan subretot l’imatge del drac qu’es escultada en forma de dragon menaçant sus la proa de lors batèls ; a mai lo nom de lors batèls es en rapòrt amb lo drac : drakkar. Los vikings tanben an un pauc paur del drac puèi que la figura de proa permet tanben de se protegir del drac que viu dins l’aiga. L’autre biais per s’atirar sas bonas gràcias es de li far un pastís coma dins Carcin amb lo cocon del drac. Escota-me plan, te vau donar l’astúcia per te protegir del drac : l’estèc es de lo far comptar (per exemple de granas de blat) per l’ocupar e doncas per se poder salvar. Es pas aisit mas es possible de lo tuar pel fuòc. Vaquí, ara coneisses los secrets del drac, e mèfi per çò qu’es present pertot a l’entorn de nosautres e dins totes los paises.”

Doncas se qualqu’un vei lo drac amb una clau cal far atention e me prevenir…

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !