Lo baron de la vinha
Fraire Mansuet : – Oh ! Vin de li miéu couòla ! “Vinum delictuos collis !” T’ai recounouissut sensa jamai t’avé tastat ! Èri anequelit e mi redounes la fouòrça, mi proucures lou soulas !
Fraire Eliacin : – E de doun sias, vous, pèr parlà ensin ?
Fraire Mansuet : – Siéu d’en Belet.
Fraire Eliacin : – E couma avès fach pèr counouisse ensin lou vouòstre vin sensa jamai l’avé tastat ?
Fraire Mansuet : – Nautre, Beletan, venen au mounde emb’aquèu gust sus li labra !
Vequí coma doi monges presentavan lo Bellet, en Lou vin dei padre, lo cap d’òbra de Francis Gag, lo nòstre autor nacional.
Lo Bellet, vin de la còla a Nissa, es lo solet vinhal a èstre e urban e dotat d’una AOC. Coma siáu per ren un especialista en vins, ai sonat lo Baron Ghislain de Charnacé.
Dau bòn, li es un baron sus dei còlas de Nissa.
La familha de sa maire es l’aliança tra l’antica noblessa de la Contèa de Nissa e l’aristocracia de la cort de Savòia. Sota lo renho de Victor-Amedeu lo II, Duc de Savòia, Prince de Pimont e Rei de Sardenha, Roissard, un oficier de la cort, a esposat Ana-Rosa au sècolo 17en. Eu, es Segretari de comanderia, ela cala drech d’una familha nòbla, lu Dettat-Doria, sinhors de Doçaiga, país de la Contèa de Niça aüra en Itàlia : lu Roissard de Bellet son naissuts.
Bernard De Charnacé, un nòble oficier francés, baron finda eu, ientra en la familha gauch au sieu matrimòni embé Ròsa de Bellet. Ghislain es un dei 5 enfants de Bernard e Ròsa e coma lu siéu antenats deputat, militari ò president de l’Acadèmia Nissarda decida èu tamben d’escriure l’istòria de la sieu familha. Es en la vinha que forjarà li sieu letras de noblessa.
En vacanças un pauc luenh de Nissa, es au telefonin que si donam un apontament embé Ghislain. L’avíi sonat au principi basta per n’en saupre un pauc mai sus lu noms dei doi raças de soca nissardi e fin finala l’escoti un brave moment sus l’istòria de la Contèa de Nissa e dei Estats de Savòia, la naissença de l’AOC en lo 41 (aüra AOP despí lo 2007), la vinha, lo Bellet… Ghislain de Charnacé es afogat e lo porríi escotar parlar dau raín e dau vin durant d’oras.
Repilha lo domani familial en lo 70, presida lo sindicat dei vins d’en Bellet e sobretot es sòci dau comitat regionau de l’INAO que contròtla la qualitat e l’origina dei vins.
Perque l’originalitat d’aqueu vin de Bellet, en mai d’èstre un vinhal plantat sus lo territòri d’una vila màger, es d’aver doi raças de soca que s’aretròvan en minga luèc fòra dei quieti còlas de Nissa.
La fòla negra, que lu paisans sonavan ensin perqué podia variar d’un an a l’autre e lo braquet. Braquet que pòrta lo meme nom qu’una grana familha dau canton, sensa qu’auguen jamai sauput qu dau vin o de la familha avia batejat l’autre.
L’AOC a permés d’assegurar la preséncia en lo vin e doncas la preservacion d’aquelu doi raças de raín, especificas a Nissa e a la sieu region (còlas de la Contèa de Nissa ma finda Provença vesina), e que l’Acadèmia Reala de Turin avia ja repertoriats dau temps que Nissa èra lo pòrt dau Reiaume de Pimont-Sardenha.
