Sabètz que mantuns deus celèbres trobadors qu’èran vaduts en Perigòrd ?

Arnaut Daniel, Arnaut de Mareuil, Bertran de Born, Elias Cairel, Giraut de Bornelh, Jausbert de Puycibot, Salh d’Escola o enquëra Maria de Ventadorn… Trobadors e trobairitz qu’an avut ua influéncia de notar, pertot en Euròpa e au delà, deu sègle XI dinc a uei. Los trouvères francés o los minessängers alemands que se’n son directament inspirats.

Mes l’esperit deus trobadors qu’a suberviscut dinc a l’epòca contemporanea : cançon contestatària, revendicativa, rap, punk, slam… Dilhèu que seré un drin estirassat de trobar un ligam dab Brassens, mes daubuns qu’i veden ua sòrta d’eretèr.

Mercés a un navèth projècte vidèo, lo Conselh Departamentau de Dordonha qu’a causit de hicar en valor los trobadors deu Perigòrd, a còps desconeguts. Qu’an sollicitat 8 personalitats, totas apassionadas de la poesia deus trobadors, qui nse van hèr la presentacion de 8 trobadors e trobairitz. Dab aqueths pertrèits de quauquas minutas, que poderatz descobrir la vita d’aqueths trobadors, enténer un troç deus lors escriuts, leguits o cantats, conéisher la lor influéncia, geografica, temporau. Que’vs balharà, a còps segurs, l’enveja de descobrir l’univèrs trobadorenc, mes tanben lo de las personalitats causidas.

Aquestes pertrèits que’s poiràn descobrir en fin d’annada 2021, suus sites deu departament de Dordonha e sus ÒCtele !