Seleccionar una pagina

Luènh de l'uèlh

0 |

La ficcion nais del verai e del bèl

Perque tornarà pas pus, una fraccion de segonda pòrta sa part documentària. Mas a l’encòp aqueste instantanèu ten luòc de ficcion. Urosament, nòstra percepcion del temps es facha de durada, nòstras vidas son traversantas. Lo documentari a besonh del temps long, dels tempses flacs, de la sensacion de durada que buta a « se far un filme ». D’unes imatges fixes arriban a nos far sentir aquel alongament ont una fraccion de segonda s’espandís sul papièr. De còps una beluga dobrís una fractura.

L’estil, la geometria, la forma, la color o lo negre e blanc – tant digam l’estetica – son un supòrt de l’informacion que fa ficcion. Qué es lo negre e blanc, s’es pas una ficcion ? Lo fotograf compausa son quadre e perseguís, conscientament o pas, una mena de mesa en scèna. Fin finala l’imatge ordena e revela çò que sasís, el : alavetz lo motiu lo mai banal o lo mai laid pòt pretendre a una cèrta armonia.

I a de « bèls imatges » de guèrra : los fusilhièrs del Tres de mayo de Goya e lo Guernica de Picasso ne son d’exemples celèbres. Dins El Tres de Mayo, lo pintre met en scèna un eveniment tragicLa repression francesa de 1808 a Madrid. dins un temps ont la fotografia existissiá pas. S’aguèssem de fòtos d’aquel periòde, es probable que lo pintre auriá tractat lo subjècte ambe mai de fantasmagoria. Es çò que faguèt Picasso, en negre e blanc justament, coma las fòtos de l’epòca.

Lo real fotografiat s’emancipa dins la ficcion coma lo vin tastat se desplega en aròmas ; pasmens l’alcoòl demòra plan present. Una fòto « es lo vestigi material de son modèl, çò que pas cap tablèu pòt èsserSur la photographie, Susan Sontag, 1977. » : son ligam al real demòra caput, constituís son ipotèsi primièra ; nos intima de la creire. Es aqueste desfasament estetic de l’objècte fotografiat qu’es ipnotizant perque, coma en poesia, despegat de sa materialitat, lo gost que n’avèm se’n tròba reauçat.

Lucian Clergue, fotograf occitan d’Arle, amic de Picasso, èra un amorós de poesia : sas fòtos ne son evidentament tescudas. Es tanben l’autor de corts documentaris filmats. Drama del taureDrame du taureau, 1965, Prèmi Louis Lumière 1966. Dins lo DVD Lucien Clergue cinéaste. ne’s un de remirable. Son dètz minutas d’un silenci rosegat pels sols sons ambients, las luènhas voses dels aficionados… Al moment ont la bèstia, lo « sol còr dreitLa cogida y la muerte, Federico Garcia Lorca, 1934. », dintra dins l’arena, un poèma de Federico Garcia Lorca bronzís. Son mantuns tablèus, coma una seria de fòtos « animadas ». Es lo corredor de la vida reglada del taure, nucli de l’espèra del public. Venon veire la mòrt ; la bèstia es negre coma lor mòrt a eles ; la rebutan en lo matant, el, ambe l’esperança derisòria de far rajar la lutz de sa negror insondabla. Atal, sens sensacionalisme, sens partit pres, Clergue se ten al pus ras del drama, lo de l’animal e capita de revelar al fons lo de l’òme, son ànsia prigonda. Segon sa conviccion o sa cresença cadun recebrà aqueles imatges quasi muts d’un biais diferent e se’n farà son imatge mental fach de pivelatge o, al contrari, d’indignacion. La transposicion « tranquilla » del verai sufís a crear quicòm mai.

La figuracion del real percutís lo nòstre païsatge mental : una ficcion nais del verai e del bèl. Fòtos e filmes documentaris son faches dels dos.

Lo Diari Pack 2020

Francisco de Goya, El tres de mayo de 1808 en Madrid, 1814, òli sus tela, Musèu del Prado, Madrid.

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Sylvain Béragnes

Nasquèri a Vilanòva d’Òlt e passèri mon enfança dins un vilatjòt a la punta del Tarn e Garona entre Carcin e val d’Òlt abans d'anar viure a Tolosa. Aprèp aver comprés, tard, l’importància de la lenga qu’ausissiái dròlle, decidiguèri de l’aprene per de bon. Soi un afogat de fotografia : practiqui de contunha, expausi de còps. S'endeven que los projèctes fotografics e l’occitan se rejonhon.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...