Seleccionar una pagina

Au cornèr de las sciéncias

0 |

Cervèth ficcion

Los autors e los realizators que saben pescar dens la sciéncia fenomèns de non pas créser e imaginar mondes futurs. Dens aqueths mondes, que i a sovent umans e autas creaturas, robòts, IA (Intelligéncia Artificiau). Fin finala, los umans qu’escaden pr’amor de las capacitats deus lors cervèths.

Tres milions d’annadas a, lo noste cervèth qu’avèva la talha de lo d’un chimpanzé. Desempuish, per escàs o per besonh, qu’ei vadut tres còps mes gran. I a ua relacion enter la talha deu cervèth e l’intelligéncia ? Atau atau. Per exemple, lo chimpanzé qu’a ua memòria immediata de las granas e que desvolopa estrategias de jòcs superioras aus umans. Lo cervèth d’Albert Einstein que pesava quauques detzenats de gramas de mens que lo d’un òme deu medish atge. Mès Einstein qu’èra atardat (de l’avís deus sons regents). A quate ans, non parlava pas enqüèra. D’alhors, que disèva eth medish lo son cervèth qu’èra lent e qu’avèva trobat causas sonque pr’amor se pausava questions de mainat dab un cervèth d’adulte…

Lo cercaire James R. Flynn qu’a muishat ua progression deu QI (Quocient Intellectuau) au sègle XXau dinc a las annadas 1990. Desempuish qu’estagna e mes qu’aquò que regressa en quauques país occidentaus. Çaquelà, la nosta aptitud a conceptualizar que creish. E la capacitat deu noste cervèth que seré la deu World Wide Web : 1 petaoctet (1015 octets). De qué continuar a progressar !

La sciéncia que perpausa protèsis neuronaus (Interfàcias Cervèth Ordenador) que permeten de contrarotlar ua protèsi per la pensada per exemple. Los projèctes actuaus que van mes luenh. Los transumanistas qu’ensajan de hèr créisher las nostas capacitats hòra lo noste còs. Dus ancians deu MIT (start-up Nectome) que perpausan un procediment d’embaumament, la vitrifixacion, tà conservar lo noste cervèth. Que pensan que poiràn numerizar lo cervèth e los sovenirs dens quauquas annadas e’us tornar crear dens un ordenador. Prètz : 10 000 dòlars. Imaginatz ! Lo vòste cervèth eternau dens ua maquina !

Lo projècte soïsse Blue Brain que visa a crear un cervèth numeric tà estudiar lo son foncionament. En 2015, l’equipa que publiquèc la simulacion numerica d’un cervèth d’arrat dab 30 000 neurònas e 40 milions de sinapsis. Desempuish 2018, que trabalha a reprodusir un cervèth uman. Lo projècte alemand FACETS qu’ei mes dirècte : que volen construsir ua IA, un ordenador qui fonciona coma un cervèth uman. Aqueste ordenador qu’a 200 000 neurònas e 150 milions de sinapsis. Totun, que’s cau brembar, lo noste cervèth que conteng 86 miliards de neurònas e 10 000 miliards de sinapsis.

Fin finala, d’autes que desvolopan ordenadors wetware, qu’ei a díser neuroordenadors o ornedadors compausats de matèria organica. La prumèra victòria qu’estoc lo neuroordenador compausat de neurònas de popa-sang de l’American William Ditto qui hasoc ua addicion en 1999.

A costat d’aqueras mostruositats passionantas, Google qu’a aviat lo projècte People+AI Research o PAIR dab lo prètzhèit de trabalhar sus l’interaccion de l’òme e la maquina en tot centrar lo sistèma sus l’òme.

Doman, un èste navèth : la maquina a cervèth d’òme ?

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Anne-Pierre Darrées

De formacion scientifica, Anne-Pierre qu’a trabalhat en grops internacionaus. En tornar tau país, que’u semblèc evident d’obrar per la lenga, indissociabla de la cultura e de l’identitat d’un pòble. A l’Escòla Gaston Febus, qu’ei en carga deu libièr e de la promocion de la cultura gascona sus internet. Qu’ei tanben secretària de las Edicions Reclams e presidenta deus Amics de Ràdio País en Comenge. Los sons motors : la nautat, lo cant liric, la literatura, los Pirenèus, la Gasconha.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.