Seleccionar una pagina

Gavotina Pantais

0 |

Divagacion sentimentala dins lei Mauras

Dins lei noms de montanhas e còlas occitanas, trobam totplen de Mont Nier (francizat en Mounier), Montmaur totei doei en Gavotina, Montmaurin en Gasconha, e una microregien, lei Mauras, en Provença.

Anem parlar dau massís que la promiera traça dau nom remonta a Montem Maurum en 888, Maura en 1409, la Maura en 1529, las Mauras de Bormettas au sègle XVI.

Es caracterizat per son costat extremament cubèrt de vegetacien, renforçat per lei luecs que li son ajustats leis adjectius « escur », « sorn », e quitament lo luec dich Negressa a Cogolin (mèfi de pas faire de còntra-sens !).

Per aquò, volem enauçar precisament un libre que, per nautres, a descrich d’un biais remirable lei Mauras : Divagation sentimentale dans les Maures, 1979, libre d’art, tèxt de Serge Rezvani, fotografias d’Hans Silvester.

Cyrus Rezvani alias Cyrus Bassiak naissut en 1928 a Teheran, Pèrsia (Iran actuau) d’un paire persan e d’una maire jusiva emigrada russa, arriba en França emb sa maire a l’atge d’un an. Fins a 7 ans, parla que russo, mas puèi sa maire, tocada per un cancre, lo manda dins un pensionat per immigrats russos e i apren lo francés. Se desbrolha e comença son camin d’artista polivalent. Son contacte emb lei Mauras se fa après guèrra qu’es pescaire au Cap Lardier a La Crotz Vaumar. Tòrna dins lei Mauras en 1952, emb sa companha Danièle, en quitant Paris per La Gàrdia Freinet. Vivon dins un modèst ostau dau sègle XIX sonat La Beata, sensa aiga ni electricitat, environada de la vegetacien dei Mauras, a la broa dau vilatge. Lo brave proprietari la vende per un bas prètz pagable quora pòdon.

Es aquí que Rezvani e sa companha escrivon, pintan, compauvan de cançons, per pagar sei deutes.

Rezvani descriu :

En 1960, lo vilatge de La Gàrdia Freinet, sensa agents immobiliers ni vacanciers, èra fòrça paure. Pensi qu’avem agut la promiera veitura. Li èran de chivaus a l’abeurador e mai de buus. Lei vilatgés son restats coma èran, de gents reservats dei montanhas, pas demonstratius coma sus la còsta [pasmens gaire luènh sus la comuna vesina de Grimaud ndlr]. Nòstra amistat es seriosa e profonda.

De mai, per eu, la regien se caracteriza ansin :

L’usura li dòna d’aires de vièlha tempèsta, de volcans sensa tèsta, de seda getada en plecs longs e misteriós… existon gaire de montanhas tan mòlas, tant adocidas au còup per l’erosien e per l’extravaganta forradura espongiosa que lei recuèrbe. Basta de s’enfonzar dins lo labirint dei còlas per esprovar tanlèu sensualament sa magia. Tot li es misteriós, fosc, quasi aquatic. Lei sotabòscs s’encabestran d’una tala diversitat d’espècias vegetalas qu’avem l’impressien d’avançar dins un desòrdre pensat coma una òbra d’art. 

Son escritura evòca tanben lei dangiers que l’amenaçan (coma lei fuècs de seuva, l’urbanizacien) e qu’eu entrevei ja, quauqueis ans en avança.

Una descripcien ben viva emb un agach agut d’un òme vengut d’autra part qu’a sauput veire e amar aquest luec e mai aquelei gents dau nòstre país. Chamja de la dicha d’ara : « Lo país es beu mas damatge que li siechon seis estatjants ! »

Divagation sentimentale dans les Maures

Serge Rezvani
Actes Sud, 2001
(Francés)
80 paginas
20 x 15 cm
18,40€
ISBN 978-2-7427-3313-2

Ne'n saber mai

A prepaus de l'autor

Laurenç Revèst

Laurenç Revèst es doctor en lingüistica (articles de vulgarizacion), professor certificat d'occitan (dialècte vivaroalpenc/gavòt) en licèus e collègis a Mentan, Recabruna, Bersolèlh e L'Escarea, president onorari e membre dal Centre Cultural Occitan País Nissart e Alpenc, fondator e cronicaire de Ràdio Nissapantai.com. Laurenç collabòra tanben a de mèdias de lenga occitana (Jornalet, Aquò d'Aquí, Sapiéncia) e escriu de poesias e de novèlas per las revistas Òc, Reclams, Gai Saber e Minutinas.org. Blogaire, actor ocasional ("Garibaldi" de Passuello, "Mistral" de Belmon, "Malaterra"...), foguèt tanben pigista e presentator sus FR3, dins l'emission "Vaquí".

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !