Renat Sette, un dei cantaires mai carismatics de la musica provençala, collabora despuèi 1993 ambe lo poèta e istorian Joan Ives Roier : de compaires de camin en tèrra occitana, mai particularament en Provença Nauta. Es ben naturalament que s’assagèt a la composicion e a la mesa en forma de 18 cançons tiradas dau recuèlh de poèmas (de sonets d’un format classic mai d’una espantanta modernitat) de Roier Les temps passats. Si faguèt acompanhar de son amic e guitarrista sarde Gianluca Dessì. L’instrument, la vòtz, lo tèxte poetic si mesclan, e dessenhan un univèrs musicau entre referéncias tradicionalas e expressivitat d’encuèi.