Seleccionar una pagina

Lo Magazina

0 |

Lo Diari jòga las prolongacions (Edito del Diari n°62)

Cobèrta Lo Diari 62

Lo Diari jòga las prolongacions

Dobrissètz los portanèls de l’estadi, alandatz las tampas de l’arena, daissatz los esportius del dimenge mai dels autres jorns de la setmana cambadejar aprèp de meses embarrats coma galinas en jaça de batariá : en aqueste estiu los portièrsgardien de but retrobaràn lor gàbia, los raquetaires batràn la tèrra, los afogats de gròs balon oval o de pichòta pauma redonda trepejaràn las pelenas, las ròdas regaràn lo quitran…

Es pauc de dire que l’estiu de 2021 serà esportiu, que s’anóncia ja coma lo revenge de l’òme sus l’embarrament, gaireben coma una liberacion de ments e de còsses sans ; aqueste edito, aqueste Diari, s’escrivon en eslalomant entre un Roland-Garròs que s’acaba, un Torn de França que comença, un Èuro de fotbòl plan aviat, de Jòcs Olimpics que ponchejan… entre una petanca, un jogging o un squash.

N’i aurà per totes e per totas, emai pel monde que l’espòrt-sistèma estrèma : sul pelenc de nòstras paginas lo còr de la mesclada es fait d’Istòria, de valors, de simbòls, de retraits, de remembres, d’emocions, de racontes… Que l’espòrt, los espòrts, que sián d’una tradicion anciana o recenta, nascuts aquí o venguts d’alhors, fan societat e carrejan lor paquet de cultura(s).

Lo rugbi, bèl primièr, es l’elefant dins lo corredor del 110 mètres a baranha110 mètres haie, mas pas sonque, amb qualques suspresas e curiositats quitament, coma aquela pichòta istòria del cricket occitan…

En capitani de la còla del Diari per aquesta partida, Guillaume Gratiolet, sostat tacticament per Matieu Casanova, seguit solide pels pilars… e tanben qualques novelaris.

Fai tirar Lo Diari !

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Danís Chapduelh

Perigòrd d'origina vivent a Tolosa aprèp un passatge a Bordèu, mas d'èime panoccitan, oficii coma cap-redactor del Diari a la seguida de Sebastian Pugin, qu'ensagi de contunhar son òbra. Ai una formacion en letras, en lenga occitana e en projèctes culturals, tanben en comunicacion, webmastering e evenimencial. Soi curiós de tot çò qu'es creacion, encara mai s'es en ligam amb la lenga occitana, e s'estimi melhor daissar parlar los autres e jogar lo "Mossur Leial" en colissas, me veiretz d'aicí e d'alai signar qualques articlons, en defòra del tradicional edito, sus de subjèctes variats. En mai del Diari soi cargat de mission sus d'autras accions de l'Institut d'Estudis Occitans de la Region Miègjorn-Pirenèus qu'o edita, e fau tanben d'autras causòtas a costat.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...